प्रमं राजीनामा बिउसा निकास: भट्टराई
येँ (सन्ध्या टाइम्स)/प्रधानमन्त्री माधव नेपालं राजीनामा बिल धाःसा वर्तमान राजनीतिक समस्या ज्यनीगु खँ माओवादीया उपाध्यक्ष डा. बाबुराम भट्टराईनं धयादीगु दु।
क्रान्तिकारी पत्रकार संघ बाग्लुङ्ग्रं ग्वसाः ग्वःगु पत्रकार सम्मेलनय् न्ववासें वय्कलं थौं च्वनी धाःगु सदनया बैठक नं च्वने मफइगु व राष्ट्रपतिं ल्ह्वंगु पलाः थःपिनि मूल मुद्दा जूगुलिं उकियात कयाः सम्झौता मयायेगु खँ नं कनादिल।
'जिमिसं ल्ह्वनागु मुल मुद्दा संवोधन मजूतले संसदया गतिरोध नं जारी जुइ' वय्कलं धयादी ।
उखे न्ह्यानाच्वंगु राजनीतिक गतिरोध चीकेगु निंतिं स्वंगू दल दथुया दथुइ सहलह जुइ धाःसां नं थौं बैठक च्वनीगु छुं हे संकेत मदुगु खँ सीदुगु दु। थुकिं राजनीतिक गतिरोध अझ ताःहाकः जुयाः वनीगु विश्लेषण नं राजनीतिक वृत्तय् जुयाच्वंगु दु ।
माओवादीं साउन २३ गतेनिसें राष्ट्रपतिया पलाः भिंकेमाःगु माग यासें सदन व सतक आन्दोलन याना वयाच्वंगु खः। माओवादीया मागयात संवोधन यायेगु धकाः राजनीतिक पार्टीतय् दथुइ सहलह जूसां निकास धाःसा पिहां वयाच्वंगु मदु। माओवादीं स्वन्ति लिपा आन्दोलनया ख्याच्वः बियातःगु दु ।
