न्हूदँया थीथी ज्याझ्वः
न्हूपुचःया मचा ब्वाज्या
न्हू पुचः भिंद्यःत्वाःया ग्वसालय् न्हूदँया लसताय् झिंनिक्वःगु मचा ब्वज्या कासा जुइगु जूगु दु । थुगु पुचलं लक्ष्मी पूजा कुन्हु सुथय् ७ ३० बजे उगु ब्वाज्या कासा यायेत्यंगु खः । बसन्तपुलीं न्ह्याइगु ब्वाज्या कासा ताःलाक न्ह्याकेत अतिश स्थापितया संयोजकत्वय् न्हय्म्ह दुजः दुगु मचा ब्वाज्या कासा उप-कमिटी नीस्वंगु दु ।
ब्वाज्याय् स्वदँनिसें झिदँ तक दुपिंमस्तय्सं ब्वति काये दइ । ब्वज्या बसन्तपुलीं न्ह्यानाः ओमबहाः लगंत्वाः ज्याबहाः न्हूघः क्वहिति जुनाः भिंद्यः त्वालय् थ्यंकाः क्वचाइ ।
सितु पुचःया लिपि कासा
सितु पुचः मध्यपुर थिमिपाखें नेपाल संवत ११२९ न्हूदँया लसताय् वइगु शनिवाः नेपाल लिपि च्वज्या कासा याइगु जूगु दु । शनिवाः सुथय् १० बजेनिसें आदर्श मावि लाय्कुलि उगु कासा न्ह्याइगु खँ ग्वसाःखलकं धाःगु दु । ग्वसाः खलकं उगु कासाय् ब्वति कायेत थीथी खलः पुचःयात आह्वान याःगु दु ।
नेवाः गुथिं स्टिकर पिथनीगु
नेवाः गुथि ख्वप कचां न्हूदँया लसताय् नेवाः गुथिया कलात्मक लोगो दुगु स्टिकर पिथनीगु जूगु दु । नापं गुथिपाखें नेपाल संवत ११२९ या नगुमाः क्यालेण्डर नं पिथनेगु क्वःछिउगु दु । अथेहे नेवाः गुथि ख्वप कचापाखें न्ह्याकाः वयाच्वंगु युग बिजय पुस्तकालयं नेपालभाषाया जक सफूत तयाः अलग नेपालभाषा सफू धुकू नं चायेकेगु क्वःछिउगु दु ।
