स्कुल संचालनया ध्यबा ज्वनाः बिसिउँ वंम्ह प्रधान अध्यापक ज्वन
वीरगंज (सन्ध्या टाइम्स)/जिल्ला शिक्षा अधिकारीया मिलोमतोय् जानाः स्थानीय छम्ह प्रधानाध्यापकं स्कूल चायेकेगु धकाः कया यंकूगु लाखौं तका दां स्कुल मचायेकुसे बिसिउँ वनेत्यंगु खँ सीवं स्थानीयवासीतय्सं आः वयात ज्वनाः थःपिनि नियन्त्रणय् कायतःगु दु ।
वीरगंजया शिवनगर स्थित होली एन्जल माविय अरविन्द सिंह नांया उम्ह प्रधानाध्यापकं जिल्ला शिक्षा अधिकारीयात तकं नजराना बियाः वीरगंज उगु स्कूलया पलेसा लक्ष्मणवामा धाः थासय् श्री सिन्दुरिया माइ प्रा.वि चायेकाः स्वंगू लाख नीन्हय्द्वः तका दां बझे याना काःगु खः ।
थ्व सीवं स्थानीय वासिन्दातय्सं सिंहयात ज्वनाः वयाके स्कूल संचालन यायेत काःगु दांया ल्यचाः काःगु इलय् छगू लाख न्हय्द्वः तकाः तलब खर्च, स्थानीय समुदाययात छगू लाख, सफू व छात्रवृत्तिइ पीद्वः तका खर्च यायेधुंगु व आः मुक्कंचय्द्वः तका जक ल्यं दुगु जानकारी बिउगु खः।
उगु गाविसया छगू धर्मशालाय् विद्यालय संचालन यायेगु व उकिया दक्वं ल्याःचाः बुझे यायेगु सहमति लिपा जक स्थानीयवासीतय्सं उम्ह प्रधानाध्यापक सिंहयात त्वःता छ्वःगु खः ।
