बृहत शान्ति सम्झौता पुनरावलोकन यायेमाः : रक्षा मन्त्रालय
रक्षा मन्त्रालयं बृहत शान्ति सम्झौताया छुं प्रावधानं नेपाली सेनाया जीवन्तपन व सवालीकरणय् प्रभाव लाःगु धासें संसद समक्ष पुनरावलोकनया निंतिं इनाप याःगु दु ।
व्यवस्थापिका संसद राज्य व्यवस्था समितिया बुधवाःया बैठकय् रक्षामन्त्री विद्यादेवी भण्डारी व रक्षा सचिव नविन घिमिरें शान्ति सम्झौता प्रावधानगत सीमाया कारण सेनाया प्रशिक्षण, पुर्नताजगी लगायत नियमित पक्षत प्रभावित जूगु गुनासो याःगु दु ।
बैठकय् रक्षामन्त्री भण्डारीं सेनाया सवल, सक्षम व सार्थक उपस्थितिया निंतिं नं शान्ति सम्झौताया छुं प्रावधानय् सहमतिपाखें समय सापेक्ष पुनरावलोकन यायेगु उपयुक्त जुइगु धयादिल । वयेकलं देशय् न्ह्याःगु कथंया सुरक्षागत हाथ्यात सम्बोधन यायेगु सामार्थ्ययुक्त सेनाया रुपय् नेपाली सेनायात तयेमाःगु व शान्ति सेनाय् छ्वयेवलय् सवल, सक्षम व प्रतिस्पर्धी क्षमतायुक्त सेना छ्वयेमाःगु बाध्यता जूगुलिं बाधा अडकाउ फुकउ यायेत कार्यसमितिं ग्वाहालि यायेमाःगु बिचाः प्वंकादिल ।
रक्षा सचिव घिमिरें विस्तृत शान्ति सम्झौताया छुं प्रतिबद्धतां सेनाया प्रशिक्षणय् आवश्यक जुइगु गोली आपूर्ति यायेमफया नेपाली सेनाया सुढृदीकरण क्षमता अभिबृद्धि थंज्याःगु थीथी पक्ष समेत प्रभावित जूगु धयादिल । वयेकलं क्षमत अभिबृद्धि यायेमदइगु बाध्यता व राष्ट्रिय सुरक्षाया संवेदनशीलतायात न्ह्यावलें नं सम्बोधन यायेफइगु कथं दक्ष, सवल व सुढृद्ध सेनाया उपस्थितिया अनिवार्यता दथुइ कुशल संयोजन यायेमाःगु हाथ्या रक्षा मन्त्रालय व नेपाली सेना नाप दुगु धयादिसें व्यवहारिक व्यवधानयात सहजीकरण यायेत आवश्यक उपायत अवलम्बन याये अनिवार्य जूगु धयादिल ।
अथेहे बैठकय् प्रधानसेनापति छत्रमान गुरुङं नं नेपाली सेनाय सशक्तीकरण यायेमाःगु खँय् बः बियादिल । वयेकलं सभासदतय्सं विदेशय् खटेजूपिं नेपाली सेनाया बारे न्यंगू न्ह्यसया लिसलय् शान्ति सेनाय् क्लिइर म्याण्डेट दु । सशक्तिकरण यानाःगु व प्रभावकारी जूयाः ज्या जूगु दाबी यानादिल ।
