चलखं ल्हानाः हानं नीखुम्ह सित

सुदूरपश्चिमय् स्वन्हु न्ह्यः निसें मदिक्क वयाच्वंगु वा वयाच्वंगु कारणं वःगु चलखं ल्हानाः अछाम, बझाङ डोटीलय् व पर्वत नीखुम्ह सीगु दु । थ्वस्वया न्ह्यः मंगलवाः सुथय् हे डडेलधुराय् चलखः ल्हानाः निखाः छेँया झिंनिम्ह सीगु खः ।

बुधवाः पर्वत छापाठाना ९ पसेहाराय् छखाः छेँय् चलखं ल्हानाः छखाःया छेँया प्यम्ह सीगु दु । चलखं ल्हानाः दुर्गाबहादुर भण्डारी, वया स्वीन्यादँ दुम्ह जहान विनु, न्ह्यदँ म्हाय् सिमाना व प्यदँया काय् विसम जूगु खँ पर्वतया जिल्ला प्रहरी निरीक्षक केदार पन्तं धाःगु दु । अथेहे उगु घटनाय् भण्डारीया झिंनिदँया म्हाय् विनु व झिदँया म्हाय् रेखायात उद्धार याःगु दु ।

बझाङय् मंगलवा: चलखं ल्हाना: छखाः हे छेँया निम्ह सीगु दुसाः निम्ह घाःपाः जूगु दु । बझाङ माझीगां गाविस ३य् धनराज उपाध्यायया छेँ चलखं ल्हानाः वया झिंच्यादँया म्हाय् जुनाकुमारी व निदँया म्हाय् पञ्चकला सीगु दु । चलखं ल्हाःगु थासय् सुरक्षाकर्मी परिचालन जुइधंकूसां मदिक्क वा वयाच्वंगुलिं उद्धार यायेगु ज्या प्रभावकारी जुइमफुगु खँ बझाङया प्रहरी नायव उपरीक्षक वसन्त पन्तं धयादिल ।

अथेहे डोटीइया दिपायल सिलगढी नगरपपालिका वडा नं १४य् च्वनिम्ह न्यादँया पुर्ण विष्ट सीगु दु । अथेहे तिलक विष्टया छेँ नं चलखः ल्हानाः वया न्यादँया काय् पूर्ण सीगु दु । अछामया पातालकोट गाविस ९ लय् चलखं ल्हानाः झिंच्याम्ह सीगु दुसाः अन उद्धारकर्मीत घटनास्थल थ्यंकाः उद्धार यायेगु ज्या जुयाच्वंगु दु ।

निरन्तर वया च्वंगु वाया कारणं सुदरपश्चिमया थीथी थाय् जलमग्न जूगु दुसाः अनया जीवन कष्टकर जूगु दु ।