शंखधर सिरपाः गोरखापत्रयात, इमेज सिरपाः नेपाल समाचारपत्रयात
नेपाल संवत ११२८ या शंखधर सिरपाः नेपाःया सरकारी न्हिपौ गोरखापत्रयात बीगु जूगु दु । वइगु म्हपूजा कुन्हु बसन्तपुली जुइगु न्हूदँ समारोह समितिया मू ज्याझ्वलय् उगु सिरपाः लःल्हाइ । झिद्वः तका दां व सिजः पौ सहितया उगु सिरपाः गोरखापत्रयात बीगु खँ सिरपाः समितिया नायः पद्मरत्न तुलाधया अध्यक्षताय् आः नकनिति च्वंगु बैठकं क्वछिउगु खः ।
अथेहे नेपाल संवत् ११२८ या इमेज सिरपाः नेपाल संवतुया प्रचार प्रसारय् ग्वाहालि याना वयाच्वंगु नेपाल समाचारपत्र न्हिपौयात बीगु जूगु दु । नेपाल संवत्या प्रचार प्रसार यायेत तःधंगु योगदान याना वयाच्वंगु ज्यायात कदर यासें बीगु उगु सिरपालय् झिंन्याद्वः तका दां व दसिपौ दइ । थ्व सिरपाः नं बसन्तपुली जुइगु न्हूदँ समारोह समितिया मू ज्याझ्वलय् हे बीगु जूगु दु ।
