प्रधानमन्त्रीया निंतिं प्रस्ताव वःगु मदु : कोइराला
नेपाली कांग्रेसया सभापति गिरिजाप्रसाद कोइरालां प्रमुख प्रतिपक्षी दल एकीकृत नेकपा (माओवादी)या पाखें प्रधानमन्त्रीया प्रस्ताव मवःगु स्पष्ट यानादीगु दु ।
बुधवाः सुथय् कोइरालाया छेँ च्वंगु कांग्रेस केन्द्रीय समितिया अनौपचारिक बैठकय् वयेकलं वंगु आइतवाः पुलांम्ह मुख्य सचिव लोकमानिसंह कार्कीया छेँय् माओवादी अध्यक्ष पुष्पकमल दाहाल 'प्रचण्ड' नाप खँल्हाबंला जूगु खसां प्रचण्डं प्रधानमन्त्रीया निंतिं प्रस्ताव मयाःगु धयादिल ।
आइतवाः कोइराला व प्रचण्ड दथुइ जूगु खँल्हाबंला लिपा संचारमाध्यमय् प्रचण्डं कोइरालयात प्रधानमन्त्रीया निंतिं प्रस्ताव याःगु बुखँ पिहांवःगु खः । थुगु बुँखय् सत्यता मदुगु धकाः माओवादी अध्यक्ष प्रचण्ड नं खण्डन यायेधुंकूगु दु ।
अथेहे कांग्रेस केन्द्रीय समितिया अनौपचारिक बैठकय् सभापति कोइरालां कात्तिकय् वीरगंजय् जुइगु महासमितिया बैठक स्थगित यायेत हानं इनाप यानादीगु दु । वयेकलं दक्वं ध्यान महाधिवेशनय् लगे यायेमाःगु धासें न्हापा नं महासमितिया बैठक स्थगित यायेत निर्देशन बियादीधुंकल ।
बैठक उपस्थित अधिकाशं नेतातय्सं कोइरालाया उगु इनाप प्रति असहमति प्वंकूगु खसां कांग्रेस कार्यवहाक सभापति सुशील कोइरालां धा:सा गिरिजाबाबुं धसाः महासमितिया बैठक लिछ्यायेमाः धासें समर्थन यानादीगु खः ।
