बुधवाः निसें संसदया बैठक
दलत दथुइ सहमति मजुया बैठक अन्यौलय्
मोहनि नखःया निंतिं स्थगित याःगु व्यवस्थापिका संसदया बैठक असोज २१ गते बुधवाः न्हिनय्सिया स्वताः ईलय् सःतुगु दु ।
नागरिक सर्वोच्चता व राष्ट्रपति डा. रामवरण यादवं प्रधानसेनापति यात थमौति बीत ल्ह्वनादीगु पलाः भिंकेमाःगु माग यासें प्रमुख प्रतिपक्षी दल एकीकृत नेकपा (माओवादीं) निलाः न्ह्यनिसें संसदया बैठक अवरुद्ध यानावयाच्वंगु दु ।
संसदया बैठक सुचारु यायेत प्रमुख स्वंगू दलत माओवादी, नेपाली कांग्रेस व नेकपा (एमाले)या नेतात दथुइ न्हिया न्हिथं बैठक च्वनाच्वंसां आः तक सहमति जुइफुगु मदुनी । कांग्रेस व एमालें मोहनिया लसताय् याःगु तुच्चा ज्याझ्वलय् स्वंगूलिं दलया शीर्ष नेतात नापं प्रधानमन्त्री माधवकुमार नेपालं दलत सहमतिया नापं थ्यंगु व सहमति असोज २१ गते संसदया बैठक च्वने न्ह्यः हे जुइगु विश्वास प्वंकूगु खः ।
स्वंगू दलत दथुइ निरन्तर बैठक च्वनाः सहलह यासां माओवादीं नागरिक सर्वोच्चता व राष्ट्रपतिया पलाःया बारे संसदय् दर्ता जूगु संकल्प प्रस्ताव बारे सहलह यायेमाःगु थःगु माग सम्बोधन मजूतल्ले संसदया बैठक चलेजुइ मबीगु खँ धयाच्वंगु दु । अथेहे सत्ता साझेदार दल कांग्रेसं धाःसा राष्ट्रपतिया बारे संसदय् सहलह यायेमफइगु अडान कयाच्वंगु दु ।
छुं न्हि न्ह्यः जक च्वंगु स्वंगू दलया बैठकय् कांग्रेस व एमालें मंकाः संकल्प प्रस्तावया मस्यौदा न्ह्यब्वःगु खः । तर उकी राष्ट्रपतिया बारे छुं खँ न्ह्यमथंगु धासें माओवादीं उकीयात अस्वीकार याःगु खः । कांग्रेस व एमाले वहे मस्यौदाया दुने नं सहमति मालेमाःगु अडान कयाच्वंगु दुसाः माओवादीं मेगू हे मंकाः संकल्प प्रस्तावया मस्यौदा तयार यायेगु तयारी यानाच्वंगु दु ।
सहमतिया निंतिं जुयाच्वंगु कुतः बावजुद नं थःथःगु हे अडानया कारणं बिच्चे थानाच्वंगु सहमतिया दथुइ मोहनि लिपाः बुधवाः निसें न्ह्याइगु धाःगु संसदया बैठक अन्यौलय् लाःगु दु ।
