दाउदया मनू स्याना बिल ?
येँ (सन्ध्या टाइम्स)/ नेपालगञ्जय् म्हिगः बहनी हत्या जूम्ह छम्ह मनू अन्डरवर्ल्ड डन दाउद इब्राहिमया मनू खः धाःगु दु। नेपालगञ्ज नगरपालिका वडा नम्बर १५ या ५७ दँ दुम्ह मजिद मनिहारयात अनया न्यूरोडया होटल लालीगुराँसय् अज्ञात पुचलं स्याना बिउगु खः ।
भारतीय सञ्चार माध्यम 'आज तकं' उकी लानाः सीम्ह मनू अन्डरवर्ल्ड डन दाउद इब्राइमया गिरोहया दुजः खः धासें नक्कली भारुया कारोबारय् तकं वयागु ल्हाः दु धाःगु दु। उखे नेपाल प्रहरीं धाःसा थुकिया पुष्टि मयाःनिगु खँ जिमि संवाददातां धाःगु दु ।
पत्रकारतय् न्ह्यसःया लिसः बिसें बाँके प्रमुख प्रहरीं धाल, 'घटना बारे आः अध्ययन जुयाच्वंगु दु ।' प्रहरीं हत्यारात मालेगु शुरु याःसां आः तक छुं सुराक मलूनिगु खँ धाःगु दु ।
मदुम्ह मजिद एमालेया मुस्लिम इत्तेहाद नांगु मुस्लिम संस्थाया बाँके जिल्ला कमिटीया पुलांम्ह अध्यक्ष खः।
मदुम्ह मजिद म्हिगः बहनी लालीगुराँस होटेलया १०५ नम्बर क्वथाय् च्वनाच्वंम्ह भारतीय नागरिक अजय सिंहयात नापलायेत वंगु खः ।
मजिदया हत्या लिपा अजय सिंह व क्वथा नम्बर १०२ लय् च्वनाच्वंम्ह विजेन्द्र सिंह ज्या दु धकाः सामान त्वःताः पिहां वंगु खँ होटेल स्रोतं धाःगु दु ।
