माओवादी सभासद्या पद खारेज
येँ (सन्ध्या टाइम्स)/एकीकृत माओवादीया निम्ह सभासदया पद खारेज जुइगु जूगु दु। संविधानसभा कार्यव्यवस्था परामर्श समितिं गठन याःगु छानवीन समितिं बिउगु प्रतिवेदनय् मातृकाप्रसाद यादव व जगतप्रसाद यादवया पद खारेज यायेगु सुझाव बिउगु खः । सुझावय् मातृका यादवं पुनर्गठन याःगु धाःगु नेकपा माओवादी निर्वाचन आयोगय् दर्ता मजू धासें उमिगु पद खारेज यायेमाःगु निष्कर्षय् समिति थ्यंगु खः ।
न्याम्ह दुजः दुगु छानवीन उपसमितिइ सभासद् पुष्पा भुसाल, यमलाल कँडेल, सरिता गिरी, वृजेशकुमार गुप्ता व लोक नारायण ढकाल दुथ्याःगु समितिं उगु सुझाव बिउगु खः।
माओवादीं सभासद् मातृका यादव व जगत यादवं पार्टी परित्याग यानाः मातृकाया न्हूगु पार्टीइ वंगु धासें उमित पदं चीकेत माग याःगु खः ।
संविधानसभापाखें स्वनातःगु कार्यदलं संविधानसभाय् प्रतिनिधित्व याःगु पार्टी त्वःताः मेगु पार्टी चायेके धुंकूगु अवस्थाय् सभासद् जुइ मफइगु व्यवस्था याःकथं निम्हं सभासदया पद खारेज जुइगु प्रतिवेदन तयार याःगु खः ।
