निसः प्रहरीयात फुड प्वाइजन
येँ (सन्ध्या टाइम्स)/ महोत्तरीया बर्दिवासय् च्वंगु छिन्नमस्ता सशस्त्र प्रहरी गणय् विषाक्त नसा नयाः निसः स्वयां अप्वः प्रहरी जवानत विरामी जूगु दु ।
न्ह्याबलें थें तुं म्हिगः बहनी जा नये धुनेवं हे प्रहरी जवानतय्त 'फुड प्वाइजनिङ्ग' जूगु खँ सशस्त्र प्रहरी गण छिन्नमस्तां धाःगु दु ।
विरामी जूपिं मध्ये निगू दर्जन प्रहरीया अवस्था गम्भीर जुयाच्वंगु खँ नं गणं धाःगु दु। विरामी जूपिं सशस्त्र प्रहरीतय्के भाइरल ज्वरोया प्रकोप खनेदुगु मेडिकल रिपोर्टं पुष्टि जूगु खँ उगु गणया प्रमुख राजेन्द्र साढीं धयादीगु दु।
विरामी जूपिं प्रहरीया वासः बर्दिवासय् च्वंगु स्वास्थ्य केन्द्र व लालगढ अस्पतालय् जुयाच्वंगु दु ।
उगु गणय् नब्बा सिंह धाइम्ह ठेकेदारं खाद्य सामग्री थ्यंकेगु ठेक्का कयातःगु खँ नं धाःगु दु। प्रहरीतय्त जूगु फुड प्वाइजनिङ्गयात कयाः अनुसन्धान न्ह्याकेगु खँ प्रहरीं धाःगु दु ।
