म्हिगः नं नेप्से थहां वन
येँ (सन्ध्या टाइम्स)/नेपाल स्टक एक्सचेन्जय् जूगु शेयर कारोबारं नेप्से परिसूचक थहां वनेगु क्रमं म्हिगः नं निरन्तरता काःगु दु। नखः धुंकाः म्हीग आइतवाः निसें शुरु जूगु कारोबारय् वाःया न्हापांगु न्हि झण्डै ४ अंकं थहां वंगु नेप्से म्हिगः नं २ दशमलव ४३ अंकं थहां वनाः ६३६ दशमलव ८७ अंकय् थ्यन। लिसें छन्हु न्ह्यःया कारोबारय् स्वयां म्हिगः दां व शेयर कारोबार नं तुलनात्मक रुपं थहां वंगु दु। अथे हे म्हिगः नं मेमेगु परिसूचक थहां वनेगु झ्वलय् सेन्सेटिभ ० दशमलव ७७ अंक थहां वन दु। फ्लोट नं ० दशमलव २२ अंकं थहां वंगु दु ।
छन्हु न्ह्यः कारोबार जूगु दक्वं उपसूचकत थहां वंगु खःसा म्हिगःया कारोबारय् धाःसा निगू जक उपसूचक थहां वनाः मेगु दक्वं कुहां वंगु दु। थहां वंगु उपसूचक मध्ये वाणिज्य बैंक समुह ४ दशमलव ०४ अंकं थहां वनाः ६४३ दशमलव ५२ अंकय् थ्यंगु दु। वाणिज्य बैंकया कारोबारय् मिश्रित लिच्वः खनेदत। उकी मध्ये म्हिगः नं लक्ष्मी बैंक, किस्ट बैंक, बिओके, एभरेष्ट, इन्भेष्टमेण्ट लगायतया बैंकया शेयरय् भाः थहां वनेवं वाणिज्य समुह थहां वंगु खः। लिसें फाइनान्स समुह पाखे नं मिश्रित रुपं कारोबार जुयव्. थुगु समुह २ दशमलव ६५ अंकं थहां वनाः ६३७ दशमलव १४ अंकय् थ्यंगु दु ।
उखे म्हिगःया कारोबारं कुहां वःगु उपसूचकय् विकास बैंक समुह शून्य दशमलव ६७ अंकं कुहां वयाः ६६८ दशमलव ८४ अंक थ्यन। जलविद्युत समुह नं १ दशमलव ५३ अंकं कुहां वयेवं ८२२ दशमलव ५७ अंकय् थ्यंगु दु। नापं विमा समुह शून्य दशमलव १३ अंकं कुहां वयाः ६०७ दशमलव शून्य ४ अंकय् थ्यन ।
म्हिगः कारोबार शुरु जुइवं हे नेप्से कुहां वंगु खः। तर बाघौ लिपा थहां वंगु नेप्से घौछि तक थहांकुहां जुयाच्वंगु खः। वयां लिपा नं थ्व क्रमं निरन्तरता काःगु खःसा अन्तय् लगातार कुहां वनाच्वंगु नेप्से बजाः बन्द जुइगु इलय् थ्यंकाः धाःसा थहां वनेगु क्रमं निरन्तरता काःगु खः। छन्हु न्ह्यः स्वयां कारोबार थहां वनेगु झ्वलय् म्हिगः न्यागू करोड पीस्वंगू लाख नीनिद्वः तका दांया न्हय्खुद्वः स्वसः व ख्वीगुंगू कित्ता शेयर न्याये-मी जुल। छन्हु न्ह्यः स्वंगू करोड ख्वीनिगू लाख ख्वीन्याद्वः तका दांया कारोबार जूगु खः। किस्ट बैंकया दकलय् अप्वः १९,८१५ कित्ता शेयर न्याये-मी जुल ।
कारोबार जूगु कम्पनी मध्ये दांया ल्याखं हाकनं छक्वः स्टायण्डर्ड चार्टर्ड बैंकं दकलय् अप्वः छगू करोड ख्वीगू लाख न्हय्छद्वः तका दांया कारोबार यात। अथे हे म्हिगः नं किस्ट बैंकं दकलय् अप्वः कमे याःगु दुसा एनएमबी बैंक अप्वः गुमे याःगु दु ।
