राष्ट्रपति बारें सदनय् सहलह यायेफइमखु : प्रधानमन्त्री
प्रधानमन्त्री माधवकुमार नेपालं प्रधानसेनापति प्रकरणय् राष्ट्रपतिं ल्ह्वंगु पलाःया बारे सदनय् छुं नं हालतं सहलह जुइमफइगु खँ धयादीगु दु । वयेकलं बरु महाभियोग व अविश्वासया प्रस्ताव समाना यायेगु तर सदनय् सहलह मयायेगु अडान कयादीगु दु ।
पोखरा विश्वविद्यालयया झिक्वःगु साधरणसभाय् ब्वति कायेत कास्कीया लेखनाथ थ्यंकादिम्ह प्रधानमन्त्री नेपालं संचारकर्मीत नाप खँल्हाबंला यानादिसें माओवादीं दर्ता याःगु संकल्प प्रस्ताव बारे सहलह यायेमफइगु बरु उकीया पलेसाः राष्ट्रपति विरुद्ध महाअभियोगया प्रस्तावया विकल्प खुला जूगु धयादिल ।
वयेकलं माओवादीं क्यंगु लचकता अझ नं कयाम जूगुलिं राजनीतिक सहमति याकनं हे जुइगु खँय् थः आशावादी जूगु धयादिल । सहमति मजूसाः देशय् दुर्घटना जुइगु व उकीं स्वंगू प्रमुख दलयात घाटा लाकीगु धयादिसें प्रधानमन्त्री नेपालं एमाले, कांग्रेस व माओवादी दथुइ उच्चस्तरीय सहमति आवश्यक जूगु धयादिल ।
प्रधानमन्त्री नेपालं शान्ति प्रकृया, सेना समायोजन, संविधान निर्माण व शासकीय स्वरुप थंज्याःगु महत्वपूर्ण विषयलय् स्वंगू प्रमुख दलत दथुइ सहलह आवश्वक जूगु धयादिसें उकीया निंतिं दलत दथुइ आपसी विश्वास व सुमधुर स्वापू आवश्यक जूगु बिचा: प्वंकादिल ।
वयेकलं राजनीतिक सहमतिया निंतिं बहुमत प्राप्त सरकार हिले म्वाःगु धयादिसें वर्तमान बहुमत प्राप्त सरकायात सुनां नं कवथले मफइगु दाबी यानादिल । वयेकलं वर्तमान सरकार क्वथलीगु माओवादीया हल्ला जक जूगु धयादिल, - 'सरकार विस्तार वा पुर्नगठन जुइफु तर क्वदली मखु ।'
