चलखं ल्हानाः निखा: छेँया झिंनिम्ह सित
निरन्तर वा वयाच्वंगु कारणं वःगु चलखं ल्हानाः डडेल्धुराया मष्टामाण्डौं गाविस वडा नं १ गर्खागांया निखाः छेँया झिंनिम्ह सीगू दु ।
मंगलवाः सुथय् चलखं ल्हानाः पीदँया डम्बर बहादुर भुल, वया जहान स्वीन्यादँया मातादेवी, न्ह्यदँया म्हाय् सुनाकुमारी, प्यदँया काय् ठगु व झिंछदँया म्हाय्चा हेमा सिगु दु । अथेहे मेखाः छेँया स्वीखुदँया विजय भुल, वया जहान स्वीप्यदँया पद्मा, खुइदँया मां लालीदेवी, काय्पिं झिंप्यदँया रमेश, च्यादँया महादेव, खुदँया बिनोद व खुलाःया म्हाय् बसन्ती सिगु जानकारी जिल्ला प्रहरी ज्याकू डडेलधुरां ब्यूगु दु ।
अथेहे चलखं ल्हानाः जूगु दुर्घटनां निम्हेसित धाःसाः उद्धार या:गु दु । उद्धार जूपिं डम्वरया काय्पिं झिंप्यदँया पुने व झिंखुदँया विष्णु दु । सदरमुकाम खलंगा पाखें नीगू किलोमिटर तापाःगु थुगु गांमय् उद्धार यायेत प्रहरी परिचालन याःगु दु ।
सुदरपश्चिमय् स्वन्हु न्ह्यः निसें निरन्तर वा वयाच्वंगुलिं अनया जनजिवन कष्टकर जूगु दु ।
