मातृका व जगतया सभासद पद खारेज जुइगु
प्रमुख प्रतिपक्षी दल एकीकृत नेकपा (माओवादी)या निम्ह सभासद मातृका यादव व जतगप्रसाद यादवया सभासद पद खारेज जुइगु जूगु दु ।
संविधानसभा कार्यव्यवस्था परार्मश समितिं निम्ह नेतातय् सभासद् पदया बारे अध्ययन यायेत सभासद् पुष्पा भुसालया संयोजकत्वय् गठित न्याम्ह दुजः दुगु उपसमिति निम्हं नेतातय् पद खारेज जुइमाःगु प्रतिवेदन मंगलवाः सभामुख सुभाषचन्द्र नेम्वाङयात लःल्हाःगु दु । उगु उपसमितिं तयार याःगु प्रतिवेदनय् मातृका यादवं पुनर्गठित याःगु नेकपा (माओवादी) निर्वाचन आयोगय् दल दर्ता मयाःगु धासें उमिगु सभासद पद खारेज यायेमाःगु खँ न्ह्यथंनातःगु दु ।
अथेहे प्रतिविदनय् संविधानसभाय् प्रतिनिधित्व याइगु पार्टी त्वःताः मेगू हे पार्टी गठन यायेधुंकूगु ईलय् सभासद पदय् च्वनाच्वने मदइगु व्यवस्था कथं निम्ह नेतातय् सभासद पद खारेज जुइमाःगु निष्कर्ष पिकाःगु दु ।
एकीकृत माओवादीं निम्हं नेतातय्त पार्टीं कारवाही याःगु व उपिं पार्टी परित्याग यानाः मेगू हे पार्टीया दुजः जुइधुंकूगु धासें सभासद् पदं चीकेत माग याःगु खः ।
