कोइरालायात प्रधानमन्त्रीया प्रस्ताव यानाःगु मदु : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' कांग्रेस सभापति गिरिजाप्रसाद कोइरालायात प्रधानमन्त्री जुइत प्रस्ताव मयानाःगु दाबी यानादीगु दु । आइतवाः कांग्रेस सभापति कोइराला नाप जूगु खँल्हाबंलाय् राजनीतिक गतिरोध ज्यंकेगु विषयलय् केन्द्रीत जूगु धयादिसें उगु ईलय् थःम्हं कोइरालायात प्रधानमन्त्रीया प्रस्ताव मयानाःगु स्पष्ट यानादिल ।
शाहीकालीन मुख्य सचिव लोकमानिसंह कार्कीया छेँय् निम्ह नेतात दथुइ जूगु खँल्हाबंलाय् माओवादी अध्यक्ष प्रचण्डं कोइरालायात प्रधानमन्त्रीया प्रस्ताव याःगु धकाः सोमवाः बुँखत सार्वजनिक जूगु खः ।
सोमवाः येँय् जूगु छगू ज्याझ्वलय् न्ववानादिसें अध्यक्ष प्रचण्डं निन्हु-प्यन्हुया दुने हे गतिरोध ज्यनीगु धयादिल । वयेकलं स्वंगू प्रमुख दलत दथुइ संवाद व सहमतिया प्रकृया न्ह्यानाच्वंगुलिं याकनं हे निकास पिहांवइगु विश्वास प्वंकादिल । वयेकलं सहमति मार्फत गतिरोध ज्यंनेधुंकाः संविधान निर्माण व शान्ति प्रकृयां गति कायइगु धयादिल ।
