कोइरालायात प्रधानमन्त्री दयेकेगु माओवादीया चाल : गच्छदार
उपप्रधानमन्त्री विजयकुमार गच्छदारं एकीकृत नेकपा (माओवादीं) नेपाली कांग्रेस सभापति गिरिजाप्रसाद कोइरालायात प्रधानमन्त्री पद बीगू माओवादीया चाल जक जूगु धयादिसें उकी असहमति प्वंकादीगु दु ।
आइतवाः येँ ग्वसाःग्वःगु छगू ज्याझ्वलय् न्ववानादिसें उपप्रधानमन्त्री गच्छदारं माओवादी अध्यक्ष पुष्पकमल दाहाल 'प्रचण्डं' अन्तिम अस्त्रया कथं प्रधानमन्त्रीया पद कांग्रेसयात प्रस्ताव याःगु व उकी लगेजूसाः देशय् तःधंगु दुर्भाग्य जुइगु धयादिल ।
वयेकलं स्वंगू दल जक जानाः देय् चलेमजुइगु धयादिसें आः सत्ता परिवर्तनया कासाय् लगेजुसाः दुर्घटना जुइगु धयादिल । प्रमखु दलया शीर्ष नेतातय्सं चीचीधंगु दलयात वेवास्ता याःगुलिं आक्रोशित जुयादिम्ह गच्छदारं स्वंगू दलयात थःपिसं सहमति यासाः मेगू दल मने जुइ धइगु भ्रम जूगु धयादिल ।
मधेशी जनअधिकार फोरम (लोकतान्त्रिक)या अध्यक्ष नं जुयादिम्ह गच्छदारं आःया सरकार छुं नं हालतं क्वमदलीगु दाबी यानादिसें माओवादीयात नं थ्वहे सरकारय् ब्वति कयाः राष्ट्रिय सरकारया रुप बीत इनाप यानादिल । वयेकलं संविधान निर्माण व शान्ति प्रकृयायात तार्किक निष्कर्षय् थ्यंकेगु खसाः माओवादीं थ्वहे सरकारय् ब्वति कायेमाःगु बिचाः प्वंकादिल ।
