'माओवादी आन्दोलन दलीय सर्वोच्चताया निंतिं'
उर्जामन्त्री डा. प्रकशशरण महतं एकीकृत नेकपा (माओवादीं) याःगु आन्दोलन नागरिक सर्वोच्चताया निंतिं मजूसें दलीय सर्वोच्चताया निंतिं जूगु द्वपं बियादीगु दु ।
सोमवाः रिपोटर्स क्लबं याःगु साक्षात्कार ज्याझ्वलय् न्ववानादिसें वयेकलं माओवादीया एकदलीय नेतृत्वयात नागरिक सर्वोच्चताया कथं स्वीकार मयायेगु धयादिल । वयेकलं राष्ट्रपतिं नागरिक सर्वोच्चता व संविधानया विरुद्ध मखसें उकीया संरक्षण व सम्बर्धनया निंतिं पलाः ल्ह्वंगु दाबी यानादिसें राष्ट्रपतिया पलाःया बारे कांग्रेसं छुं नं सम्झौता मयाइगु धयादिल ।
कांग्रेस केन्द्रीय दुजः नापं जुयादिम्ह उर्जामन्त्री महतं माओवादीं कांग्रेस सभापति गिरिजाप्रसाद कोइरालायात प्रधानमन्त्रीया प्रस्ताव यानाः धरापय् लाकेत स्वःगु द्वपं बियादिल । वयेकलं अवरुद्ध संसदयात निकास बीत जुयाच्वंगु कुतःयात सत्ता समीकरणया कासाः कथं मथुइकेत माओवादीयात इनाप यानादिल ।
अथेहे ज्याझ्वलय् माओवादीया संसदीया दलया प्रमुख सचेतक पोष्टबहादुर बोगटीं माओवादी स्थायी कमिटीया बैठकं नागरिक सर्वोच्चता व राष्ट्रपतिया पलाःया बारे स्पष्ट रुपय् संकल्प प्रस्तावय् न्ह्यमथंसाः संसद चले यायेमबीगु निर्णय याःगु धयादिल । वयेकलं थ्व निगू विषयलत संकल्प प्रस्तावय् दुमथ्याकूसाः स्वन्ति लिपाः सशक्त आन्दोलन यायेगु ख्याच्वः बियादिल ।
नेता बोगटीं आइतवाः माओवादी अध्यक्ष पुष्पकमल दाहाल 'प्रचण्ड' रायमाझी आयोगं जनआन्दोलनया दोषी ठहर याम्ह पुलांम्ह मुख्य सचिव लोकमानिसंह कार्कीया छेँ वंगु विषयया बारे पार्टी दुने सहलह यायेगु धयादिल । वयेकलं रायमाझी आयोगं दोषी ठहर याःपिं दक्वसितं पार्टीं कारवाही यायेमाःगु माग याःगुलिं थुकीया बारे पार्टी दुने सहलह यायेगु धयादिल ।
