नेवाः राज्य मवःसा हानं संघर्ष
जातीय स्वशासनया वकालत
ख्वप (सन्ध्या टाइम्स) जातीय स्वतन्त्रतायात क्वत्यलाः राष्ट्रया उत्थान जुइ फइ मखु धइगु नारा थ्वयेकाः निन्हुयंकं थनया याछेँ त्वालय् जूगु विराट नेपालभाषा साहित्य सम्मेलन क्वचाल। सम्मेलनया लिपांगु न्हिया ज्याझ्वः विराट गुथिया नायः त्रिरत्न शाक्यया सभापतित्वय् जूगु। 'नेवाः स्वायत्त राज्य पलिस्थाया निंतिं नेवाःतय् भूमिका' विषयक प्रवचन ज्याझ्वलय् न्ववानादीपिं फुक्कं वक्तातय्सं नेवाः स्वायत्त राज्य अनिवार्य जूगु खँ न्ह्यथँसें यदि उगु ब्यवस्था मजुल धाःसा निरन्तर रुपं नेवाःत हाकनं नं थःपिनि संघर्षया ज्याझ्वलय् कुहां वयेगु ख्याच्वः बिउगु दु ।
ज्याझ्वलय् नेवाः देय् दबूया नायः नरेश ताम्रकारं नेवाःतय् आदिभूमि नेवाः राज्यया निंतिं न्ह्यचिलेगु बाहेक मेगु विकल्प हे मदु धासें आन्दोलनं प्राप्त अधिकारयात संस्थागत यायेत नं थुगु माग पूवंकेमाः धयादिल। नेपाः राष्ट्रिय पार्टीया अध्यक्ष डा. केशवमान शाक्यं नेवाः राज्यया ऐतिहासिक व वर्तमान भौगोलिक स्थितिया बारे कनादीगु खः। नेवाः देय् गुथि नेपालमण्डलया न्वकु डा. चुन्दा बज्राचार्यं स्वशासन जक दयां मगाः आत्मनिर्णयया अधिकार सहितया जातीय स्वशासन दुसा हे जक धात्थें खयेक नेवाःतय् विकास याये फइ धयादिल। राष्ट्रिय योजना आयोगया पुलांम्ह दुजः डा. पुष्पराज राजकर्णिकारं योजना आयोगं न्हापा राज्य विभाजन व विकास निर्माण बारे याःगु ज्याया बारे कनादिल ।
विराट गुथिया दुजः बाबुकाजी साछें लसकुस यानाः न्ह्याकूगु उगु ज्याझ्वलय् नेवाः स्वायत्त राज्य मंकाः संघर्ष समितिया संयोजक नरेन्द्रभक्त हाडा, नेपाः लोकतान्त्रिक नेवाः संघया नायः सानुराजा शाक्य, विराट गुथिया न्वकु लोकेन्द्र बज्राचार्य, विराट गुथिया छ्याञ्जे महेन्द्रगोपाल कर्माचार्य, नेपाली कांग्रेसया सभासद् तीर्थराम डंगोलपिंसं 'नेवाः स्वायत्त राज्य स्थापनाया निंतिं नेवाःतय् भूमिका' बारे न्ववानादीगु खः ।
ज्याझ्वलय् साहित्यपाखे चिनाखँ विधाय् ज्ञानेन्द्रमान बज्राचार्य न्हाप व रश्मि नापित लिउ, बाखनय् न्हाप, लिउ व लियां लिउ लाःपिं नजरराम महर्जन न्हाप, विजयरत्न असंबरे लिउ व विनिता महर्जन लियां लिउ लाःगु खःसा च्वसुया लागिं सन्जु महर्जनयात सिरपाः बिउगु खः। ज्याझ्वलय् बहनि थीथी सांस्कृतिक ब्वज्या नं जूगु खः ।
