मिखाय् धुलं छ्वाकेत जातीय खँ
जातीय स्वशासनया विरोध
ख्वप (सन्ध्या टाइम्स)/ जनता म्वाःसा भाषा म्वाइ धइगु नारा थ्वयेकाः त्रिपुरासुन्दरीइ निन्हुयंकं जूगु नीगुंगूगु नेपालभाषा साहित्य तःमुँज्या व सांस्कृतिक ब्वज्या तःजिक क्वचाल ।
साति कुन्हुया ज्याझ्वलय् निन्हुयंकं पाठ जूगु च्वसुया उत्कृष्ट रचनाकारपिंत नेमकिपाया अध्यक्ष नारायणमान बिजुक्छेँ रोहितं सिरपाः व दसिपौ लः ल्हानादिल। निन्हुयंकं जूगु ज्याझ्वलय् चिनाखँपाखे नारायणप्रसाद कुसिंङा न्हाप, भक्तलक्ष्मी भासिमा लिउ व श्यामकृष्ण खुलिमुली लियांलिउ लाःगु खः। अथेहे बाखं विधाय् एल.के. सुन्दर न्हाप, प्रकाश तजले लिउ व के. पी. छुस्याकी लियांलिउ लाःगु खः। च्वसुपाखे शिवकृष्ण कोजू न्हाप व कृष्ण प्रजापति लिउ लाःगु खः ।
ज्याझ्वलय् मूपाहां रोहितं जातीय खँ ल्हाइपिं व नेवाः जातीय संगठन चायेकातःपिं फुक्कं राजनीतिक पार्टीया जातीय नेतात फुक्कं हे खय् ब्रम्हूत जुयाच्वंगु न्ह्यथनादिसें खय् ब्रम्हूतय्त हे नेतृत्व याकेगु निंतिं जनताय् मिखाय् धुलं छ्वाकेत जक तःधंगु राजनीतिक पार्टीतय्सं जातीय खँयात ल्ह्वनाच्वंगु खः थुकिं जातीय गौरव थकाये फइ मखु धयादिल। नेमकिपाया सचिव सभासद् सुनिल प्रजापतिं कम्यूनिष्टतय्सं गबलें नं जातीय व क्षेत्रीय खँय् जनतायात अलमल यायेगु स्वइ मखु धासें समग्र सर्वहारा वर्गया मुक्ति लिपा जक थीथी जाति, जनजाति, दलितत व मिस्तय्गु वास्तविक उत्थान जुइगु दावी यानादिल ।
८ वडाया निवर्तमान वडाध्यक्ष हिरण्यलाल जोशीया सभापतित्वय् जूगु सातिकुन्हुया ज्याझ्वलय् प्रा. डा. पुरुषोत्तम लोचन श्रेष्ठ, संस्कृतिविद् तेजेश्वरबाबु ग्वंगः, वरिष्ठ पत्रकार भैरव रिसाल, सभासद् लीला न्याइच्याई, सभासद् जग्यबहादुर शाही, ख्वप नगरपालिकाया निवर्तमान मेयर प्रेम सुवाल लगायतया वक्तातय्सं न्ववानादीगु खः। ज्याझ्वलय् थीथी गायक रामकृष्ण दुवाल नापं थीथी पुचःपाखें म्येँ न्यंकेगु ज्या जूगु खः ।
तःमुँज्या मूगुथिया नायः चन्द्रबहादुर उलकं लय्ताखँ न्यंकादीगु ज्याझ्वलय् दांभरी वीरेन्द्र त्वाय्नाबासुं तःमुँज्याया ल्याःचाः न्यंकादीगु खः। बहनी सांस्कृतिक ज्याझ्वः जूगु खः ।
