पंचांग समितिया निर्णय अमान्य
येँ (सन्ध्या टाइम्स)/पञ्चाङ्ग निर्णायक समितिं थुगुसी नं म्हपुजा व लक्ष्मीपुजाया तिथि स्यंकूगुलिं नेवाःतय्सं उकियात माने मयाइगु जूगु दु। नेपाःया मौलिक संवत् नेपाल संवत्या न्हूदँ कछलाथ्व पारु कुन्हु लायेमाःथाय् आमै कुन्हु हे न्हूदँ व म्हपुजा न्यायेकेगु धकाः पञ्चाङ्ग निर्णायक समितिं निर्णय याःगु धकाः थीथी पात्रो व पत्रपत्रिकाय् सुचं पिहां वयाच्वंगुलिं थुकिं देशय् सांस्कृतिक भ्रम र विवाद पिकाये फुगु जूगुलिं येँ, यल, ख्वप व मेमेगु लागाया समाजसेवी बुद्धिजीवी, भाषिक, जातीय र धार्मिक संघसंस्था, जनबाहाः, स्वयम्भू र विजेश्वरीया गुर्जु प्रतिनिधितय् वृहत मुँज्यां पञ्चाङ्ग समितिया उगु निर्णय माने मयायेगु निर्णय याःगु खः ।
नेपालभाषा मंकाः खलःया ग्वसालय् जूगु उगु वृहत भेलां कुलाचार, लोकाचार एवं मौलिक परम्परा कथं हे थुगु दँया स्वन्ति पर्व कौलागा आमै (कार्तिक १ गते) आइतवाः कुन्हु लक्ष्मी पुजा, कछलाथ्व पारु (कार्तिक २ गते) सोमवाः कुन्हु न्हूदँ व म्हपुजा अले कछलाथ्व दुतिया (कार्तिक ३ गते) मंगलवाः कुन्हु किजापुजा पर्व न्यायेकेगु धकाः नं सर्वसम्मत निर्णय याःगु दु ।
थ्वहे निर्णय कथं थःथःगु मौलिक पर्व न्यायेकेत उगु भेलां सम्बन्धित सकसितं दुनुगलंनिसें अपिल याःगु दु। लिसें नेपाल सरकारं कार्तिक २ गते तक जक स्वन्तिया बिदा बियातःगुली कार्तिक ३ गते किजा पुजा कुन्हु नं सार्वजनिक विदा बीत माग याःगु दु ।
