न्हूगु सुरक्षां व्यापारीयात राहत
येँ (सन्ध्या टाइम्स)/ न्हूगु सुरक्षा रणनीति कथं सरकारं पूर्वी पहाडी जिल्लाय् सशस्त्र प्रहरी क्याम्प स्थापना यायेवं आः चन्दा आतंकपाखें थःपिं मुक्त जुइगु आशा पूर्वी नेपाःया व्यापारीतय्सं याःगु दु। पहाडय् उत्पादन जूगु कृषिजन्य वस्तुइ लिम्बुवान संगठनतय्सं कर म्हयेगु यानाच्वंगुलिं थ्व सुरक्षा रणनीतिं राहत बीगु आशा व्यापारीतय्सं याःगु दु।
जातीय संगठनतय् विरोध जुइक नं सरकारं न्हूगु सुरक्षा रणनीति कथं भूमिगत व अर्ध भूमिगत संगठनयात पनेत पूर्वी पहाडी जिल्लाय् सशस्त्र प्रहरी क्याम्पत तःगु खः।
मेची अञ्चलया थीथी लिम्बुवानवादी संगठनतय्सं कृषिजन्य उत्पादनय् थः यत्थे कर म्हयाच्वंगु दु। यला व्यवसायी संघया अध्यक्ष राजेन्द्र घिमिरें कनादी कथं ताप्लेजुङ्गं छगः ट्रक यला झापाया बिर्तामोड थ्यंकेबलय् ७५ द्वः तका अवैध कर पुले मालाच्वंगु दु ।
आः सशस्त्र प्रहरीया क्याम्प स्थापना जुइवं थःपिंसं उगु कर पुले म्वाःलीगु खँय् आशावादी जुयाच्वनागु खँ नं वय्कलं कनादिल ।
