मातृका माओवादीया कार्यकर्तायात यातना बिउगु द्वपं
येँ (सन्ध्या टाइम्स)/न्हू गठन जूगु नेकपा माओवादीया संयोजक मातृका यादवं थःगु पार्टीइ वइपिं नेता व कार्यकर्तायात एकीकृत माओवादीया कार्यकर्तातय्सं ख्याच्वः बीगु व यातना बीगु ज्या यानाच्वंगु द्वपं बिउगु दु।
थौं सुथय् जनकपुरय् पत्रकारतलिसे खँ ल्हायेगु झ्वलय् वय्कलं उगु द्वपं बियादीगु खः ।
थःपिनि पार्टीया संगठन विस्तार जुइवं एकीकृत माओवादीया बिचल्ली जूगु धासें वय्कलं बारा विराटनगर व येँ लगायतया जिल्ला नेता कार्यकर्तात थःगु पार्टीइ दुहां वःगु सह याये मफयाः थुकथं आक्रमण यानाच्वंगु द्वपं नं वय्कलं बियादीगु दु ।
थम्हं माक्व ई बी मफुगुलिं अखिल तराई मुक्ति मोर्चा जयकृष्ण गोईत सहितया मेगु सशस्त्र पुचःत लिसे जुइ धाःगु कार्यगत एकता सम्बन्धी सहलह न्ह्याये मफुगु खँ कँसें वय्कलं तर उपिंलिसे टेलिफोनं खँ धाःसा जुयाच्वंगु जानकारी बियादिल ।
