शिल्पकार समुदायया विद्यार्थीतय्त हन
ख्वप (सन्ध्या टाइम्स)/ शिल्पकार युवा समुहया ग्वसालय् पद्म उच्चमावि लाय्कुलि जूगु ज्याझ्वलय् सामान्य प्रशासन मन्त्री प्रभाकर प्रधानाङ्ग 'रविन्द्र श्रेष्ठं' शिल्पकार समुदायपाखें थुगुसीया एसएलसी परीक्षाय् ताःलाःपिं विद्यार्थीतय्त शनिवाः सिजःपौ लःल्हासें हन। उगु ज्याझ्वलय् समाजया जेष्ठ नागरिकतय्त नं हंगु खः।
ज्याझ्वलय् न्ववायेगु झ्वलय् मन्त्री श्रेष्ठं थः पदया सदुपयोग यानाः ज्या यायेत पार्टी परिवर्तन यानाः वयाम्ह जूगुलिं समुदायपाखें छु माग यात उकियात मिखा तिसिनाः सही यायेत थः तयार दुगु खँ कनादिल ।
नारायणप्रसाद शिल्पकारया सभापतित्वय् जूगु ज्याझ्वलय् ल्वहंकःमि समाज यलया नायः मोतिलाल शिल्पकारं समुदायया विकासया लागिं सरकारी स्तरं ग्वाहालि यायेमाःगु माग यानादिल ।
उत्कृष्ट विद्यार्थीपिं एभरेष्ट इग्लिस स्कुलया श्रीकृष्ण शिल्पकार, रीना शिल्पकार व तिना शिल्पकारयात सिरपाः नं लःल्हाःगु ज्याझ्वलय् शिल्पकार युवा समुहया सल्लाहकार संयोजक दुर्गालाल शिल्पकार व ज्याझ्वःया संयोजक राजेश शिल्पकारपिंसं नं न्ववानादीगु खःसा थीथी सांस्कृतिक ब्वज्या नं जूगु खः ।
