हाकनं फोहोर वायेगु पनाबिल
ख्वप (सन्ध्या टाइम्स)/ सिसडोलया स्थानीय वासिन्दां थनिंनिसें फोहोर वायेगु ज्याय् पंगः थंगु दु ।
'छखा छेँय् छम्ह रोजगार'या लिसें सरकारं प्रतिवद्धता प्वंकूगु १३ सूत्रीय माग पूमवंकूगु धासें थनिंनिसें फोहोर वायेगु ज्याय् पंगः थंगु खः ।
फोहोर वायेगु ज्याय् स्थानीय वासिन्दां पंगः थनेवं येँय् हाकनं फोहोर मुनेगु शुरु जूगु दु। गुकिं यानाः वातावरणय् प्रत्यक्ष लिच्वः लाइगु खँ वातावरणविद्तय्सं धाःगु दु ।
थ्वहे झ्वलय् समस्या समाधान यायेगु निंतिं वार्ता यायेत सःतूसां नं स्थानीय जनतां वार्ता मयायेगु खँ धाःगु मनपाया वातावरण विभागया प्रमुख रविन्द्रमान श्रेष्ठ कनादीगु दु।
सरकारं फोहोर वायेगु ज्याय् पंगः थनीपिंत कारवाही यायेगु कथं फोहोर व्यवस्थापन ऐन २०६६ तयार यानाच्वंगु इलय् फोहोर वाके मबिउगु खः। ऐन कथं फोहोर वायेगु ज्याय् पंगः थनीपिंत न्याद्वः निसें छगू लाख तका जरिवाना व दछि तक कैद याये फइगु व्यवस्था दु ।
