नेप्से ४ अंकं थहां वन
येँ (सन्ध्या टाइम्स)/नखः झ्वलय् छवाःयंकं कारोबार बन्द जूगु शेयर कारोबार म्हिगः निसें हाकनं न्ह्याःगु दु। छवाःयंकंया बन्द लिपा न्हापांगु जूगु कारोबारय् नं नेप्से थहां वंगु दु। नखःया इलय् बन्द जुइ न्ह्यः तसकं म्हो जक अंकं नेप्से थहां वंगु खः। नखः लिपाया शेयर बजाः सुधार जुयाः म्हिगःया कारोबारं नेप्से ३ दशमलव ८९ अंकं थहां वनाः ६३४ दशमलव ४४ अंकय् थ्यंगु दु। म्हिगःया कारोबारय् मेमेगु नं परिसूचक थहां वनेगु झ्वलय् सेन्सेटिभ १ दशमलव ८४ अंक थहां वंगु दु। फ्लोट नं ० दशमलव ६७ अंकं थहां वन ।
कारोबार जूगु कम्पनी मध्ये छुं छुं वाणिज्य बैंकया कारोबार कुहां वंसा आपाःथें बैंकया कारोबार धाःसा थहां वंगु दु। दकलय् अप्वः लक्ष्मी बैंकया ६९/-, नविल बैंकया ५०/-, स्टायण्डर्ड चार्टर्ड बैंकया ४१/-, किस्टया ३३/- व बीओकेया ३१/- दां थहां वनेवं वाणिज्य बैंक समुह नं ८ दशमलव २८ अंकं थहां वनाः ६३९ दशमलव ४९ अंकय् थ्यंवंगु दु ।
अथे हे विकास बैंक समुहपाखे नं गोर्खा डेभलपमेण्ट बैंकया ५०/-, विराटलक्ष्मी विकास बैंकया ४१ तका दां थहां वनेवं थुगु समुह नं ७ दशमलव २५ अंकं थहां वनाः ६६९ दशमलव २९ अंकय् थ्यंगु दु। फाइनान्स समुह नं १ दशमलव १५ अंकं थहां वनाः ६३४ दशमलव ५४ अकय् थ्यंगु दु। उखे विमा समुह नं ० दशमलव ५३ अंकं थहां वनाः ६०७ दशमलव १७ अंकय् थ्यन ।
नेप्से परिसूचक म्हिगः कारोबार शुरु जुयाः छुं ई तक स्थिर जुयाच्वंगु खःसा कारोबार शुरु जूगु झण्डै बाघौ लिपा थहां वंगु खः। तर नं थहां कुहां जुइगु झ्वलय् अन्तय् नेप्से थहां मदिक्क थहां वनेवं बजाः बन्द जूगु खः ।
म्हिगः नेप्से थहां वंसां नखः न्ह्यःया थें धाःसा कारोबार सन्तोषजनक खनेमंत। म्हिगः स्वंगू करोड ख्वीनिगू लाख ख्वीन्याद्वः तका दांया पीप्यद्वः सछि व न्हय्च्यागू कित्ता शेयर न्याय-मी जुल। नेशनल हाइड्रो पावरया दकय् अप्वः ४५ सय कित्ता शेयर न्याये-मी जुल। दकलय् म्हो एल्पीक एभरेष्ट, आईसिएफसि वित्तीय संस्था व नेपाल क्रेडिट एण्ड कमर्श बैंकया २० कित्ता शेयर जक न्याये-मी जूगु दु।
कारोबार जूगु कम्पनी मध्ये दांया ल्याखं दकलय् अप्वः स्टायण्डर्ड चार्टर्ड बैंकं छगू करोड स्वप्यंगू लाख पीन्हय्द्वः तका दांया कारोबार यात। अथे हे किस्ट बैंकं दकलय् अप्वः कमे याःगु दुसा सिभिल मर्चेण्ट वित्तीय संस्था दकलय् अप्वः गमे याःगु दु ।
