प्रधानमन्त्री व माओवादी अध्यक्ष दथुइ सहलह
असोज २१ गते दुने हे अवरुद्ध संसद सुचारु यायेगु व स्वन्ति न्ह्यः राजनीतिक गतिरोध ज्यंकाः न्हूगु सहमति यायेगु धकाः नेतातय्सं धयाच्वंगु ईलय् प्रधानमन्त्री माधवकुमार नेपाल व एकीकृत नेकपा (माओवादी)या अध्यक्ष पुष्पकमल दाहाल 'प्रचण्ड' दथुइ राजनीतिक निकास मालेत सहलह जूगु दु ।
सोमवाः माओवादी नेतृ हिसिला यमीया तता कयो देवीया कोटेश्वरय् च्वंगु छेँय् जूगु सहलहलय् माओवादी अध्यक्ष प्रचण्डं प्रधानमन्त्री नेपालयात दक्वसितं मान्य जुइकथं सहमतिया प्याकेज प्रस्ताव तयार यायेत इनाप यानादिल । निम्ह नेतात दथुइ शान्ति प्रकृया व संविधान निर्माणया विषयलय् नं खँल्हाबंला जूगु खः ।
खँल्हाबंला लिपाः प्रधानमन्त्री नेपालं अवरुद्ध संसद सुचारु यायेगु विषयलय् कांग्रेस व एमालें न्ह्यब्वःगु मस्यौदा दुने पाखें हे सहमतिया बिन्दु मालेत थप पहल यायेगु धयादिल । वयेकलं प्रचण्ड नापया खँल्हाबंलाय् छुं ठोस सहमति मजूसां सहलह सकारात्म जूगु व गतिरोध ज्यंकेत माओवादी अध्यक्ष नं सकारात्म दुगु कनादिल ।
थ्वस्वयां न्ह्यः राजनीतिक गतिरोध ज्यंकेत माओवादी अध्यक्ष प्रचण्डं राष्ट्रपति डा. रामवरण यादव व नेपाली कांग्रसया सभापति गिरिजाप्रसाद कोइराला नाप सहलह यानादीधुंकूगु दु ।
