'कांग्रेस नेतृत्वया सरकारय् माओवादीं ब्वति काइगु हल्ला जक'
एकीकृत नेकपा (माओवादी)या उपाध्यक्ष डा. बाबुराम भट्टराईं नेपाली कांग्रेसया नेतृत्वया सरकारय् माओवादीं नं ब्वति काइगु खँ हल्ला जक जूगु धयादीगु दु ।
आइतवाः कांग्रेस सभापति गिरिजाप्रसाद कोइराला व माओवादी अध्यक्ष पुष्पकमल दाहाल 'प्रचण्ड'या दथुइ जूगु खँल्हाबंलाय् माओवादी अध्यक्षं कांग्रेस सभापतियात प्रधानमन्त्री जुइत इनाप याःगु व अज्याःगु सरकारय् माओवादीं नं ब्वति काइगु धकाः सोमवाः पिथंगु बुखँ असत्य जूगु धयादिल । वयेकलं उगू बुखँ प्रति आपत्ति प्वंकूसें माओवादीया माग सम्बोधन मजूतल्ले सरकार गठन बारे खँ मजुइगु धयादिल ।
सोमवाः पाल्पाया तानसेनय् क्रान्तिकारी पत्रकार संघं ग्वसाःग्वःगु ज्याझ्वलय् न्ववानादिसें उपाध्यक्ष भट्टराईं राष्ट्रपतिं संविधान विपरित पलाः ल्ह्वंगुलिं हे माओवादी आन्दोलन यायेत बाध्य जूगु धयादिल । वयेकलं माओवादीया छपाः ल्हातय् सहमति व मेगूलि आन्दोलन दुगु धयादिसें स्वन्ति न्ह्य: तक नं राष्ट्रपतिया पलाःया बारे सहलह मजूसाः माओवादीं निर्णायक आन्दोलन याइगु ख्याच्वः बियादिल ।
विदेशी हस्तक्षेपया अन्त्य यानाः देशय् नागरिक सर्वोच्चता कायम यायेगु हे माओवादीया प्रमुख एजेण्डण जूगु धयादिसें वयेकलं जनतां ईलय् हे संविधान निर्माण यायेगु जिम्मेवारी माओवादीयात ब्यूगु व उकीया निंतिं माओवादी प्रतिबद्ध जूगु धयादिल ।
