प्रधानमन्त्रीं जनआन्दोलनय् घाःपाः जूपिंत नापलात
प्रधानमन्त्री माधवकुमार नेपालं जनआन्दोलन-२लय् घाःपाः जुपिं मुकेश कायस्थ व बिष्णुलाल महर्जनया छेँ वनाः नापलानादीगु दु । वयेकलं निम्हेसितं सरकारं मासिक बियावयाच्वंगु प्यद्वंया ग्वाहालि अप्वयेकाः झिद्वं बिगू प्रतिबद्धता प्वंकादिल ।
प्रधानमन्त्री नेपालं आः तक अचेत अवस्थाय् दुम्ह भ्वँतया मुकेश कायस्थया छेँ वनाः जानकारी कयादीगु खः । २०६२ साल चैत २७ गते सुरक्षामर्कीया गोलीं लानाः घाःपाः जुम्ह मुकेशयात नापलाये धुंकाः प्रधानमन्त्री नेपालं देय्या निंतिं योगदान याम्ह मुकेशयात सरकारं न्ह्याःगु ग्वाहालि यायेत नं तयार जूगु धयादिसें आगामी मन्त्रीपरिषदया बैठकं मुकेशया भत्ता अप्वयेकीगु निर्णय यायेगु धयादिल ।
घाःपाः जुम्ह मुकेशया छेँजः नं प्रधानमन्त्रीयात मुकेशयात 'जिउँदो शहीद' घोषणा यायेमाःगु, थप वासः याकेगु व्यवस्था व भरणपोषणया व्यवस्था सरकारं यायेमा:गु माग याःगु दु ।
अथेहे प्रधानमन्त्री नेपाल, एमाले अध्यक्ष झलनाथ खनाल सहितया पुचलं जनआन्दोलनय् घाःपाः जुम्ह मेम्ह बिष्णुलाल महर्जनया अवस्था बारे नं जानकारी काःगु दु । येँया सतुंगलय् च्वंगु छेँ वनाः नापलायेगु झ्वलय् प्रधानमन्त्री नेपालं महर्जनयात सरकारं फक्व ग्वाहालि यायेगु आश्वासन बियादिल । अथेहे महर्जनया छेँ दनेत का:गु प्यंगू लाख त्यासाः नं सरकारं पुलाबीगु निर्णय याःगु दु ।
घा:पा: जुपिं निम्हं कायस्थ व महर्जन घाःपाः लिपाः आः तक खँल्हाये मफुनी ।
