एसएसबीया यातनां छम्ह नेपाःमि सित

भारतीय सीमा सुरक्षा बल (एसएसबी)या यातनां रौतहटया छम्ह सर्वसाधारण नेपाःमिया ज्यान वंगु दु । व्यापार यायेत सीमावर्ती भारतीय बजाः घोडासन वंम्ह स्वीन्यादँया मुकलराय यादवया एसएसबीया जवानं शनिवाः बहनी यातना ब्यूगु खः ।

सिम्ह यादवया छेँजःया कथं सीतामढी बेसक्याम्प जमुनियाया एसएसबी जवनतयसं यादवयात नियन्त्रणय् कयाः दाःगु खः । यादवयात ल्हाः तुती चीना प्यघौ तक नियन्त्रणय् तयाः दाःगु खः । प्यघौ लिपाः नियन्त्रण मुक्त जुम्ह यादव छेँय् थ्यंगु छुं ईया लिपाः हे मदुगु खः ।

यादवयात स्याःगु विरोधय् स्थानीय सर्वसाधारणतय्सं सीमावर्ती बंकुल बजारय् आइतवाः प्रदर्शन याःगु दु । प्रदर्शनकारीतय्सं एसएसबीया ज्यादतिविरुद्ध नारा थ्वकूसें यादवया छेँजःयात क्षतिपूर्ति बीमाःगु माग याःगु दु ।

यादवया जहान नापं प्यम्ह काय् व निम्ह म्हाय् दी ।