'गतिरोध ज्यंकाः ईलय् हे संविधान निर्माण'
वर्तमान राजनीतिक गतिरोध ज्यंकाः ईलय् हे संविधान निर्माण यायेगु खँ प्रमुख दलाया शीर्ष नेतातय्सं धाःगु दु । नेतातय्सं गतिरोध ज्यंकाः सहमति व सहकार्यया विकल्प मदुगु खँ नं धाःगु दु ।
मोहनि, स्वन्ति, छठ व न्हूदँया लसताय् नेकपा (एमालें) आइतवा: याःगु भिंतुना कालबिल व तुच्चा ज्याझ्वलय् पत्रकारतलिसे खँल्हाबंला यासें नेतातय्सं सहमतिया निंतिं शीर्ष नेतृत्व तहलय् तत्काल सहलह यायेगु धाःगु दु । नेतातय्सं २१ गतेनिसें व्यवस्थापिका संसदया गतिरोध चायेकेत वः स्वन्ति न्ह्यः हे राजनीतिक सहमति जुइगु विश्वास प्वंकूगु दु ।
तुच्चा ज्याझ्वलय् थ्यंकादीम्ह नेपाली कांग्रेसया सभापति गिरिजाप्रसाद कोइरालां दलत दथुइ सहमति दयेकेत याकनं शीर्ष नेतात सम्मिलित उच्च स्तरिय राजनीतिक संयन्त्र दयेकेमाःगु खँ धयादिल । उच्च स्तरिय राजनीतिक संयन्त्रं राजनीतिक निकास बिइगुया लिसलिसे राष्ट्रय् वयेफुगु संकट चीकेफइगु वय्कःया विश्वास दु । सभापति कोईरालां वइगु २१ गतेदुने हे सहमति जुयाः सदन चालीगु आशा नं प्वंकदिल ।
एकीकृत नेकपा (माओवादी)या नायः पुष्पकमल दाहाल 'प्रचण्डं' राजनीतिक सहमति मालेगु निंतिं मुख्य दलया नेतातय्सं त्याग यायेमाःगु धयादिल। राजनीतिक संयन्त्र दयेकेवं हे समस्या समाधान मजुइगु टिप्पणी यासें प्रचण्डं तत्कालया समस्यात समाधान यासें संयन्त्र नं दयेकेमाःगु बिचा: प्वंकादिल ।
ज्याझ्वलय् प्रतिक्रिया बियादिसें प्रधानमन्त्री माधव कुमार नेपालं २१ गतेदुने हे राजनीतिक समाधान पिहांवइगु धयादिल । उच्च स्तरिय राजनीतिक संयन्त्रं पार्टीइ दुगु असमझदारी नं चीलीगु धयादिसें वयेकलं २१ गते स्वयाः न्ह्यः हे संयन्त्र दयेकेत कुतः यायेगु धयादिल।
एमाले नायः झलनाथ खनालं राजनीतिक दलतय्गु मजवुत एकता व साझा संकल्प जूसा निर्धारित इलय् हे संविधान दयेकेफइगु विश्वास प्वंकादिल ।
तुच्चा ज्याझ्वःयात एमाले अध्यक्ष खनाल, उपाध्यक्ष बामदेव गौतम लगायत नेतातय्सं लसकुस याःगु खः । ज्याझ्वलय् प्रधानमन्त्री, सभामुख, प्रमुख दलया नेतात, कार्यकर्ता लगायतं ब्वति काःगु खः ।
