यातायात व्यवसायी संघं आन्दोलनया ख्याच्वः
नेपाल राष्ट्रिय यातायात व्यवसायी सर्वोच्च महासंघ व स्वरोजगार यातायात व्यवसायी संघं आन्दोलनया ख्याच्वः ब्यूगु दु । सरकारं स्वंगू पांग्रे ग्याँस टेम्पो स्वनिगलं चीकेत याःगु निर्णय विरुद्ध उमिसं सरकारयात उगु ख्याच्वः ब्यूगु खः । गुकि न्हापांगु चरणय् कन्हय् सुथय् गुताः इलंनिसें येँया प्रमुख स्थानय् शान्तिपुर्ण टेम्पो र् याली व २० गते यातायात व्यवस्था ज्याकू घेरे यायेगु दुगु खः ।
आइतवा: येँय् पत्रकार सम्मेलन यासें सर्वोच्च महासंघया सभापति विष्णु सिवाकोटीं बिनाकारण बिना क्षतिपूर्ति गैरकानुनी तवरं याःगु निर्णय लितः कायेत सरकारलिसे माग याःगु दु । वय्कलं व्यवसायी दथुइ लाःगु अन्याययाविरुद्ध सशक्त आन्दोलनया विकल्प मदुगु धयादिल ।
ज्याझ्वलय् स्वरोजगार यातायात व्यवसायी संघया नायः रामकुमार म्लोनं ग्याँस टेम्पो चीकूसां डिजेलपाखें चले जुइगु सवारी साधन नं प्रदुषण अप्वयेकीगु व झिंनिगू सिट क्षमताया टेम्पो चीका झिंप्यंगू निसें झिंखुगू सिट क्षमताया सवारी दुतः हयेगु निर्णय अव्यवहारिक जुइगु दाबी यानादिल ।
