बौद्ध परम्पराय् नरबली

सम्पादकजु

वंगु नेसं ११२८ कौलागा पंचमि कुन्हु अन्नपूर्ण पोष्टय् पिदंगु रास जोशीया अवशेष नरबलीको धइगु च्वसु ब्वनेधुंकाः नुगलय् ब्वलंगु खँ च्वयाच्वना ।

मोहनि नखःया नवमि कुन्हु यलया नेवाः बौद्ध विहार सुबहाः जयमनोहरा महाविहारय् अनया बौद्ध संघया आजुपिं नापं दुजःपिंसं थःगु शरीरया ला ध्यनाः गुसःदँनिसें न्ह्याना वयाच्वंगु नरबलीयात गुगुकि स्वसः दँ न्ह्यः तक जीवित मनू हे बली बीगु धयातःगु दु निरन्तरता बीगु नामय् अन च्वंम्ह महांकाल द्यःया न्ह्यःने होम यानाः मनूया ला दुयाः वयाच्वंगु जुल । गुथिया मू उद्देश्य धइगु द्यः तम्वयाः जुइगु अनिष्ट मदयेकेगु खः । गथे कि अनया सर्वसंघया दुजः ३२ म्ह स्वयां अप्वः जुलकि अप्विपं सदस्यपिनिगु अकाल मृत्यु जुइगु च्वसुइ हे न्ह्यथनातः कथं थौंकन्हय् ६३ म्ह दुजः दुगु जुल म्ह मस्याइगु आदि जुइ ।

सर्व सत्व प्राणीपिनिगु उद्धार यायेत सर्व प्रकारं जगतो हिताय धइगु गुरु मन्त्र ब्वना वयाच्वंपिं बज्रयानी नेवाः बौद्धतय्सं नं परम्पराया नामय् प्रत्यक्ष रुपं नरबली तक बिया वयाच्वंगु खँ न्यनेबलय् म्ह हे सिरिङ्ग जुइगु व विरोधाभाष नापं अन्धविश्वासयात नालाः कया वयाच्वंगु खनेदु । गुगु कि बौद्ध धर्मया शील समाधि व प्रज्ञाया माध्यमं अनित्य दुःख व अनात्मा थुइकेगुया अःखः खः ।

बज्रयानी नेवाः बौद्ध धर्मय् छ्यला वयाच्वंगु सन्ध्या भाषायात थुइकेगु कुतः मयाःगुलिं थुकथं मिखाय् गां चिका तःगु थेंज्याःगु परम्परा न्ह्याका वयाच्वंगु मखुला धइगु अनुमान नं याउँक हे यायेफु । नेपाः देय् धर्म निरपेक्ष जुइ- धुंकूगु थौंया अवस्थाय् बौद्ध विद्धानिपंसं थुज्वःगु बौद्ध धर्मया अबौद्ध संस्कृति न्हंकेत पलाः न्ह्याकेगु आवश्यक जुल धइगु खँय् ध्यान आकर्षण जुइला ।

- ब्रम्हदेव प्रदीप
उबहाः यल-६

More Stories Like this