सुशासन एकाई गठन यायेत सरकारयात उजं
अख्तियार दुरुपयोग अनुसन्धान आयोगं फुक्क मन्त्रालय मातहतया निकायलय् सुशासन एकाई गठन यायेत सरकारयात उजं ब्यूगु दु । थ्व स्वयां न्ह्यः हे निर्णय जुइधुंकूगु सुशासन एकाई अझ गठन जूगु मदुनि ।
आइतवा: आयोगं छगू विज्ञप्ति पिथना: मन्त्रालयया मासिक बैठकयात नियमित यायेत नं उजं ब्यूगु दु । सेवाग्राहीलिसे प्रत्यक्ष सरोकार तइगु सरकारी ज्याकुथिइ उमिसं ज्या तत्काल यायेत व मजुइगु जूसा ज्या जुइगु दिं क्वःछिनाः उकिया लिखित जानकारी बिइत आयोगं सरकारयात उजं ब्यूगु दु । सार्वजनिक खरिद प्रक्रियायात सरल व पारदर्शी दयेकेत 'ई-बिलिङ' प्रक्रिया लागू यायेत व सरकारी ज्याय् छ्यलीगु कागजातया आधिकारीकता प्रमाणित यानाः जक थुइकेत आयोगं उजं ब्यूगु दु । स्वनिगलय् दुगु सार्वजनिक सरकारी व गुठी जग्गाया अद्यावधिक लगत तयार यानाः उचित संरक्षणया व्यवस्था यायेत आयोगं सरकारयात उजं नं ब्यूगु दु ।
