भारतीय जवानया यातनां नेपाःमि सित
येँ (सन्ध्या टाइम्स)/ भारतीय सुरक्षा बल एसएसबीया जवानतय्सं यातना बिउगुलिं छम्ह नेपाःमि सीगु दु। रौतहटया सुमजुवा गाविया मुखल राय यादवयात म्हिगः भारतीय सीमा सुरक्षा बलया जवानतय्सं ज्वनाः यातना बिउगु खः ।
निबोरा सूर्ति ज्वनाः भारतपाखे वनाच्वंम्ह यादवयात जमुनिया पोष्टयापिं एसएसबीया जवानतय्सं नियन्त्रणय् कयाः यातना बिउगु खँ वयाः छेँजःपिंसं धाःगु दु । एसएसबीया यातना लिपा म्हिगः बहनी ७ बजे नियन्त्रणं मुक्त जुयाः थःगु छेँय् थ्यंम्ह यादव वंगु चान्हय् सीगु खँ छेँजःपिंसं धाःगु दु ।
घटनाया विरोधय् स्थानीय व्यापारीतय्सं थौं सुथंनिसें बंकुल बजाः बन्द याकेगुया लिसें एसएसबी विरुद्ध प्रदर्शन यानाच्वंगु दु । भारतीय एसएसबीया जवानतय्सं पटक पटक नेपाःमितय्त धम्की बीगु, दायेगु, नेपाःमिया सामग्री लाकाः नयेगु, सीमाना क्वत्यलेगु आदि ज्या याना वयाच्वंगु खःसां नं सरकारं चिउताः मक्यंगु द्वपं नं स्थानीय जनतां बिउगु दु ।
थज्याःगु घटना जुलं तकं सरकार सुम्क च्वनाच्वंगु खँय् स्थानीय वासिन्दातय्सं आक्रोश प्वंकाच्वंगु दु ।
नेपाः-भारत स्वाःगु सीमानाय् भारतीय जवानतय्सं नेपाःमि जनतायात दुःख बियाच्वंगुलिं थनिं लछि न्ह्यः तिनि नेपाः व भारतीय जनतां राप्तिइ एसएसबी विरुद्ध प्रदर्शन याःगु खः ।
