गाडी दुर्घटनाय् बैंकया शाखा प्रमुख मंत
येँ (सन्ध्या टाइम्स)/ बुटवलं भैरहवा वनाच्वंगु छगः गाडी दुर्घटना जुयाः छम्ह सीगु दुसा निम्ह घाःपाः जूगु दु।
म्हिगः बहनी बुटवलं भैरहवा वनाच्वंगु बा. ५ च ७४८५ नम्बरया गाडी लखनचोक धइगु थासय् छमा सिमाय् न्याः वंगु खः। उगु दुर्घटनाय् लानाः हिमालयन बैंकया प्रबन्धक विनयकुमार जोशी सीगु खःसा दिपेन्द्र भट्ट व कुमार लामा घाःपाः जूगु खः ।
गाडी दुर्घटनाय् घाःपाः जूम्ह जोशी भैरहवा मेडिकल कलेजय् वासः याकुयाकुं मदुगु खः। घाःपाः जूपिं मध्ये भट्टयात भरतपुर मेडिकल कलेजय् व कार चालक लामायात वासः यायेत येँय् हःगु दु ।
न्ह्यःनें वयाच्वंगु ट्रिपरयात साइड बीगु झ्वलय् गाडी अनियन्त्रित जुयाः सिमाय् न्याः वंगु खः ।
