थाय् थासय् चक्का जाम व बन्द
ट्रकं ब्याक यानाः साइकल चालकयात स्याःगु द्वपं बियाः सुर्खेत विरेन्द्रनगरया स्थानीय जनतां अनया यातायात अवरुद्ध यानाः पसः बजाः नं फुक्कं बन्द याना बिउगु दु ।
लु १ ख ४९९९ नम्बरया ट्रकं साइकल यात्री दिनानाथ योगीयात ठक्कर नकूगु खःसा ठक्करं क्वःदःम्ह योगीयात हाकनं गाडी ब्याक यानाः स्याःगु द्वपं स्थानीय जनतां बिउगु दु ।
यातायात अवरुद्ध यायेगु झ्वलय् स्थानीय जनतां थाय्थासय् टायर च्याकाः प्रदर्शन यानाच्वंगु दु । प्रहरीं यातायात सुचारु यायेत स्वःगु इलय् प्रहरी व स्थानीय जनताया दथुइ ल्वापु जुयाः प्रहरी सहित छुं स्थानीय जनता घाःपाः जूगु दु ।
उखे काभ्रेय् म्हिगः निसें नेपाल स्वतन्त्र यातायात व्यवसायीतय्सं यानाच्वंगु अनि- श्चितकालीन चक्का जाम थौं नं जारी जुयाच्वंगु दु । सवारी चालक श्रीकृष्ण श्रेष्ठयात अज्ञात पुचलं दायाः स्याना बिउगु विरोधय् मजदूरतय्सं थ्व चक्का जाम याना याःगु खः । उकिं यानाः अरनिको राजमार्ग व वीपी राजमार्ग ठप्प जुयाच्वंगु दु ।
अथे हे सुनसरी नं रिलायन्स स्पिनिङ मिलय् दुहां वनाः मजदूरतय्त प्रहरीं दाःगु विरोधय् थौं मजदूरतय्सं उगु लागाय् नं यातायात बन्द याना बिउगु दु ।
