मध्य व सुदूर पश्चिमय् मोबाइल सेवा ठप्प
येँ (सन्ध्या टाइम्स)/ मध्य व सुदूरपश्चिमय् थौं सुथंनिसें मोबाइल सेवा अवरुद्ध जूगु दु ।
पूर्वपश्चिम महेन्द्र राजमार्ग अन्तर्गतया बाँकेया कोहलपुर व दांगया लमही सतक खण्डया दथुइ अप्टिकल फाइबर चानातःगुलिं मोबाइल सेवा अवरुद्ध जूगु खँ नेपाल टेलिकमया क्षेत्रीय कार्यालय नेपालगञ्जया निमित्त प्रमुख नामकर न्यौपानें कनादीगु दु ।
अप्टिकल फाइबर चाना बिउगुलिं प्रिपेड, पोष्टपेड, स्काई व सीडीएमए सेवा ठप्प जूगु दु। थुकिं यानाः उगु लागाया प्यंगू लाख सेवाग्राही मर्काय् लाःगु खँ धाःगु दु ।
उगु लागाय् पटक पटक अप्टिकल फाइबर चायेगु ज्या जुयाच्वंगुलिं सेवाग्राहीतय्सं सास्ति फये मालाच्वंगु दु।
चानातःगु अप्टिकल फाइबर दयेकेगु निंतिं छगू पुचः उखे वनेधुंकूगु जानकारी नं अधिकृत न्यौपानें बियादीगु दु ।
