थपाआजु बाबुकाजी शाक्यया ९६ बुन्हि हन
यल (सन्ध्या टाइम्स)/यलय् च्वंगु थीथी बहाः बहीया ज्येष्ठतम थपाआजु बाबुकाजी शाक्यया ९६ दँया बुन्हि छगू ज्याझ्वः यासें तःजिक हन। थपाआजु बाबुकाजी शाक्य यम्पि महाविहार (ईबही)या थपाआजु खः। थःगु हे निवास कुमारीपाटीइ न्ह्याकूगु उगु ज्याझ्वलय् शाक्यसिंह विहारया श्रद्धेय भिक्षु धम्मपाल व थाइल्याण्डं बिज्याःम्ह श्रद्धेय भन्तेपाखें पञ्चशील बियाबिज्याःगु खः। अथे हे श्रीलंकां बिज्याःम्ह पूज्यपाद भन्तेपाखें धर्मदेशना व भिक्षु भद्दीय, भिक्षु अशोक व गुरुमां विजितापाखें सामुहिक परित्राण पाठ यानाबिज्याःगु खः ।
ज्याझ्वलय् लसकुस यानादिसें भाजु पुष्परत्न शाक्यं श्रद्धेय भिक्षुपिंत साधुवाद बियादिल। सुमंगल विहारया उपासिका इन्द्रलक्ष्मी शाक्यपाखें बुद्धया म्येँ हालाः न्यंकूगु थुगु ज्याझ्वलय् थीथी महानुभावपिंसं थःथःगु नुगःखँ प्वंकाः थपाआजुया निरोगी जुयाः ताःआयु म्वाये दयेक धकाः प्रार्थना याःगु खः। सिन्सियर हर्बल ब्यूटी पार्लर ट्रेनिङ सेन्टरया कार्यकारी प्रमुख शान्ता शाक्यं सुभाय् देछायादीगु खः ।
