स्मारक तोडफोड याःपिं स्वम्हेसित ज्वन
ख्वप (सन्ध्या टाइम्स)/ मोहनि नखःया इलय् लाय्कू दरबारय् जुइगु तुयूम्ह सल ब्वाकीगु जात्राया इलय् जात्रा स्यंकेगु नियतं तोडफोडय् संलग्न जूगु द्वपनय् प्रहरीं स्वम्हेसित ज्वंगु दु ।
प्रत्यक्षदर्शीतय्गु उजुरीया लिधंसाय् ख्वप नगरपालिका वडा नं. १७ य् च्वंम्ह झिंच्यादँ दुम्ह विक्रम दुवाल, ख्वप नगरपालिका १५ वडा इटाछेँय् च्वंम्ह झिंगुदँ दुम्ह विकास बोय्जु व ख्वप नगरपालिका ६ वडा चोर्चाय् च्वंम्ह नीछदँ दुम्ह रामकृष्ण लवजुयात प्रहरीं ज्वंगु खः ।
उमित जात्राय् आक्रमण याःगु, स्मारक लागाय् तोडफोड याःगु, विश्व प्रसिद्ध लुँध्वाखाय् अप्पां छ्यानाः व लाकामं प्यंकाः स्यंकेत स्वःगु व दरवार क्षेत्रय् च्वंगु प्रहरी प्रभागया साइनबोर्ड तोडफोड याःगु द्वपं बियातःगु दु। ज्वंपिंत सार्वजनिक मुद्दा तयाः कारवाही न्ह्याकेगु खँ जिल्ला प्रहरी ज्याकुथि ख्वपं धाःगु दु ।
