विष्णुमति सिथय् बँपसः तयेकीगु
सतकय् बँपसः तयाच्वंपिंत अनं चीकाः विकल्प बीगु नामय् सरकारं बिष्णुमति खुसि सिथय् च्वंगु खाली बीगु कुतः यानाच्वंगु खँ सीदुगु दु । उकिया निंतिं उगु लागाय् थौंकन्हय् डोजर हयाः सफा यानाच्वंगु खँ नं धाःगु दु ।
तर थ्व ज्यायात स्थानीय जनतां धाःसा विरोध याःगु दु । थुकिं खुसि फोहोर जुयाः स्वनिगःया जग्गा पिनेयापिं मनूतपाखें अतिक्रमण जुइगु क्रम अझ अप्वइगु खँ स्थानीय जनतां धाःगु दु ।
उखे सरकारं थ्व बँपसल्यातय्त विकल्प मालेगु लागिं सरकारं पुलांम्ह मेयर केशव स्थापितया अध्यक्षताय् छगू समिति नीस्वंगु दु ।
थ्वहे झ्वलय् बँपसल्यातय्सं थौं स्थानीय विकास मन्त्रालय येँ मनपा व यल उपमनपाय् ज्ञापनपत्र लःल्हाःगु दु । उकी थःपिंत वैकल्पिक व्यवस्था यायेमाःगु माग यानातःगु दु । उिपं येँ मनपाय् ज्ञापनपत्र बिउ वंगु झ्वलय् प्रहरी व बँपसल्यातय् दथुइ छझाः ल्वापु जूगु खःसा उगु ल्वापुइ लानाः छुं बँपसल्यात घाःपाः जूगु दु ।
