सहमति मजुसाः स्वन्ति लिपाः माओवादीं आन्दोलन याइगु
राष्ट्रपतिया पलाः मभिंकूसें सहमति जुइमखु : भट्टराई
प्रमुख प्रतिपक्षी दल एकीकृत नेकपा (माओवादीं) स्वन्ति तक नं सहमति कायम मजूसाः सशक्ता आन्दोलन याइगु जूगु दु ।
आइतवाः माओवादी स्थायी कमिटीया बैठकं राजनीतिक गतिरोधया निकाशया निंतिं माओवादीं ल्ह्वनावयाच्वंगु नागरिक सर्वोच्चता व राष्ट्रपतिया पलाःया विषयलय् ठोस निकास पिहांमवसाः स्वन्ति लिपा सशक्त आन्दोलन यायेगु निर्णय याःगु खः । बैठकं असोज महिना तक सहलह व सहमतिया कुतः जारी यायेगु निर्णय नं याःगु दु ।
अथेहे बैठकय् पार्टी उपाध्यक्ष मोहन वैध 'किरणं' न्ह्यब्वःगु सांगठनिक प्रतिवेदन पारित याःगु दुसाः महाधिवेशनय् अध्यक्ष पुष्पकमल दाहाल 'प्रचण्ड' व उपाध्यक्ष किरणं संशोधित विधान न्ह्यब्वयेगु कथं जिम्मेवारी कोछीउगु दु ।
बैठकं पार्टीया आगामी महाधिवेशन तयारी यायेत सांगठानिक परिचालनया निंतिं थीथी झिंच्याःगु विभागत नं गठन याःगु दु । आइतवाः गठन याःगु विभागय् पार्टी स्कूल विभाग, महिला विभाग, प्रचारप्रसार विभाग, शिक्षा विभाग, जातिय व क्षेत्रीय विभाग, कानुन व न्याय विभाग, कृषि व सहकारी विभाग, वतावरण व पर्यटन विभाग, स्वास्थ्य विभाग, शहीद व बेपत्ता परिवार विभाग, भूमिसुधार विभाग, श्रम विभाग, संस्कृति विभाग, आर्थिक विभाग, आदि दु ।
माओवादी प्रवक्ता दिनानाथ शर्मां बैठकं दक्वं पोलिटब्यूरो दुजःयात छवाःया दुने सवारी साधन पार्टीयात लःल्हायेत निर्देशन ब्यूगु धयादिल । अथेहे वयेकलं नेपाल संवत ११३० न्हूदँया लसताय् माओवादीं कार्तिक ३ गते चियापान ज्याझ्वः ग्वसाःग्वयेगु निर्णय नं बैठकं याःगु कनादिल ।
अथेहे माओवादी उपाध्यक्ष डा. बाबुराम भट्टराईं राष्ट्रपतिया पलाः मिभंकूसें सहमति जुइमफइगु खँ धयादीगु दु । वयेकलं राष्ट्रपतिया असंवैधानिक पलाः यथावत तयाः याइगु सहमतिया छुं अर्थ मदइगु दाबी यानादिल ।
आइतवाः कपिलवस्तुइ जूगु छगू ज्याझ्वलय् न्ववानादिसें उपाध्यक्ष भट्टराईं कांग्रेस व एमालेया सल्लाह कथं राष्ट्रपतिं असंवैधानिक पलाः ल्ह्वंगु धयादिल । वयेकलं दलत आः नं न्हापाया बिचाः ज्वनाः च्वंगु व सुधार जुइ चाहेमजूगु द्वपं बियादलि । अथेहे वयेकलं दलतय्सं थंज्याःगु लँपू मत्वतिगु खसाः माओवादीं जनताया अधिकार सुनिश्चित यायेत न्ह्याःगु पलाः ल्ह्वनेत नं तयार जूगु धयादिल ।
