'छन्हु-निन्हुया दुने हे गतिरोध अन्त्य'
प्रमुख दलया नेतातय्स छन्हु-निन्हु दुने हे राजनीतिक गतिरोध अन्त्य जुइगु खँ धयादीगु दु । नेपाली कांग्रेसं मोहनिया लसताय् ग्वसाःग्वःगु चियापना ज्याझ्वलय् प्रधानमन्त्री माधवकुमार नेपाल नापं एकीकृत नेकपा (माओवादी)या अध्यक्ष पुष्पकमल दाहाल 'प्रचण्ड' व नेकपा (एमाले)या अध्यक्ष झलनाथ खनालं थुगु बिचाः प्वंकादीगु ख: ।
ज्याझ्वलय् प्रधानमन्त्री नेपालं वइगु २१ गते दुने हे राजनीतिक गतिरोधया निकास पिहांवइगु धयादिल । वयेकलं स्वंगू प्रमुख दलत दथुइ जुयाच्वंगु सहलह सकारात्मक जूगु धयादिसें छुं छुं खँय् जक सहमति जुइ ल्यं दनीगुलिं निकास याकनं हे पिहांवइगु विश्वास प्वंकादिल ।
अथेहे माओवादी अध्यक्ष प्रचण्डं राजनीतिक गतिरोध यायेत सहलह जुयाच्वंगु व समस्या ज्यंकेत गिरिजाबाबुं नं बः बियादीगु धयादिसें छन्हु-निन्हुया दुने उच्चस्तरीय बैठक च्वनाः सहमति कायम जुइगु बिचाः प्वंकादिल ।
एमाले अध्यक्ष खनालं सहमतिया निंतिं दलतय्सं कुतः यानाच्वंगु व उगु सहलह पाखें गतिरोध ज्यंकेगु स्पष्ट संकेट खनेदुगु धयादिल । वयेकलं याकनं नं थंज्याःगु सहमति जुइगु दाबी नं यानादिल ।
न्हावलें कतिं पुन्हि कुन्हु कांग्रेस मू ज्याकूथीइ याइगु चियापान समारोह थुगुसि भृकुटिमण्डपय् याःगु खः । उगु समारोहलय् प्रधानमन्त्री, सभामुख, मन्त्रीत, दलया शीर्ष नेतात, कुटनीतिक नियोगया प्रमुख लगायत थीथी ख्यःया व्यक्तित्वतय् उपस्थिति दुगु खः ।
