सहमति मजुसाः विद्रोह पाखें सत्ता कब्जा : भट्टराई
एकीकृत नेकपा (माओवादी)या उपाध्यक्ष डा. बाबुराम भट्टराईं दलत दथुइ सहमति मजूसाः विद्रोह यानाः सत्ता कब्जा यायेगु ख्याच्वः बियादीगु दु ।
न्वलपरासीया बेल्डियाय् कार्यर्काता नापलयेगु ज्याय् न्ववानादिसें वयेकलं दलत दथुइ सहमतिया निंतिं सहलह जुयाच्वंसां सहमति जुइगु सम्भावना म्हो जक जूगु धयादिसें सहमति मजूसाः विद्रोह मार्फत सरकारय् वनीगु धयादिल । वयेकलं स्वन्ति तक नं सहमति मजूसाः विद्रोह निश्चित जूगु धयादिल ।
दलतय्सं माओवादीं ल्ह्वंगु नागरिक सर्वोच्चताया माग सम्बोधन मयाःगु कारणं हे सहमति जुइत लिबाःगु धयादिसें माओवादी उपाध्यक्ष भट्टराईं उगु मागयात सम्बोधन मयासाः गुनं हालतं सहमति जुइमफइगु धयादिल ।
वयेकलं दलत माओवादीया मागय् संवेदनशील मजूगु द्वपं बियादिसें थुकीं हे सहमतिया संकेत नं अत्यन्त न्यून जूगु धयादिल । वयेकल थःपिं जम्मेवार जुयाः राजनीतिक गतिरोध अन्त्य यायेत वार्ताया पहल यानाच्वंगु नं धयादिल ।
