प्रतिपक्षया बिचाः निषेध याःगु माओवादीया ठहर
एकीकृत नेकपा (माओवादीं) कांग्रेस व एमालें प्रतिपक्षया बिचाःयात निषेध यानाः मंकाः संकल्प प्रस्तावया मस्यौदा हःगु ठहर याःगु दु ।
शनिवाः च्वंगु माओवादीया स्थायी कमिटीया बैठकं निगू सत्तारुढ दलं पेश याःगु मस्यौदां समस्या समाधान मजुइगु निष्कर्ष नं पिकाःगु दु । बैठकं प्रधानसेनापतियात थमौति बित राष्ट्रपितं ल्ह्वंगु पलाःया सम्बन्धय् मस्यौदाय् ठोस प्रस्ताव मवःगु धासें उगु मस्यौदा अस्वीकार याःगु खः ।
बैठक लिपाः माओवादी प्रवत्ता दिनानाथ शर्मां प्रतिपक्षीया बिचाःयात निषेध यानाः मस्यौदा हःगुलिं बैठकं उकीयात अस्वीकार याःगु खँ कनादिल । वयेकलं आः सहमतिया निंतिं शीर्ष नेतात च्वनाः निर्णय याइगु धयादिल ।
माओवादीं संकल्प प्रस्तावय् राष्ट्रपतिया पलाः नागरिक सर्वोच्चताया विपरित जूगु वाक्य न्ह्यथनेमाःगु माग याःगु दु । अथेहे माओवादीं सरकारयात प्रतिपक्षीया माग सम्बोधन यायेगु ज्याय् गम्भीर जुइत इनाप याःगु दु ।
माओवादी स्थायी कमिटीया मेगू बैठक आइतवाः सुथय् हानं च्वनीगु जूगु दु ।
