स्वंगू दलया बैठक बिना सहमति क्वचाल
राजनीतिक गतिरोध ज्यंकेगु निंतिं संकल्प प्रस्तावयात अन्तिम रुप बीत च्वंगु स्वंगू प्रमुख दलया बैठक शनिवाः नं निष्कर्ष विहीन जूगु दु ।
बैठकय् शुक्रवाः थें माओवादीं राष्ट्रपतिया पलाःया बारे संकल्प प्रस्तावय् न्ह्यथनेमाःगु व कांग्रेसं राष्ट्रपतिया बारे छुं नं न्ह्यथने मज्यूगु अडान कायेवं विना निष्कर्ष क्वचाःगु खः । आः थुकी सहमतिया निंतिं स्वंगू दलया शीर्ष नेतातय् बैठक च्वना: ठोस निकास पिकाइगु जूगु दु ।
बैठक न्ह्यायेवं कांग्रेस व एमालें मंकाः प्रस्ताव न्ह्यब्वःगु खसाः माओवादीं उकी राष्ट्रपतिया पलायात असंवैधानिक धकाः छुं नं खँ न्ह्यथनामतःगुलिं मान्य मजुइगु खँ धाःगु खः । माओवादी उपाध्यक्ष नारायणकाजी श्रेष्ठ 'प्रकाशं' संकल्प प्रस्तावय् माओवादीं ल्ह्वंगु मू मुद्दाय् प्रष्ट उल्लेख मयाःगुलिं थःपिंसं असहमति प्वंकाःगु कनादिल ।
कांग्रेस उपसभापति रामचन्द्र पौडेलं धाःसाः प्रस्तावया छुं सामान्य विषयलय् जक माओवादीं असहमति प्वंकूगु धयादिसें आः शीर्ष नेतातय् बैठकं थुकीयात अन्तिम रुप बीगु धयादिल ।
मंकाः संकल्प प्रस्तावय् राष्ट्रपतिया क्षेत्राधिकारया बारे सहलह यायेगु व आवश्यक जूसाः संविधान संशोधन यायेफइगु, सैनिक ऐन संशोधन यानाः सेनायात नागरिक मातहत ह्येगु खँ न्ह्यथंनातःगु दु । स्वंगू दलया बैठकं मंकाः संकल्प प्रस्ताव तयार यायेगु जिम्मेवारी एमालेयात ब्यू कथं प्रस्ताव एमालें तयार याःगु खः ।
