मंकाः संकल्प प्रस्ताव बारे सहमति जुइमफुत
वर्तमान गतिरोध ज्यंकेगु निंतिं मंकाः संकल्प प्रस्ताव तयार यायेत शुक्रवाः च्वंगु स्वंगू प्रमुख दलया बैठकय् सहमति जुइमफुत ।
शुक्रवाः एकीकृत नेकपा (माओवादी), नेपाली कांग्रेस व नेकपा (एमाले) दथुइया बैठकं मंकाः संकल्प प्रस्ताव तयार यायेमफुगु खः । थुकी सहमति यायेत स्वंगू दलया बैठक हानं शुनिवाः च्वनीगु जूगु दु ।
माओवादीं राष्ट्रपतिया बारे संसदय् सहलह जुइमाःगु व कांग्रेसं राष्ट्रपतिया बारे छुं हे खँ प्रस्तावय् न्ह्यथंने मज्यूगु अडान कायेवं शुक्रवाः सहमति जुइमफुगु खः । थ्वस्वयां न्ह्यः स्वंगू प्रमुख दलत दथुइ राष्ट्रपतिया पलाःया बारे मंकाः संकल्प प्रस्ताव यंकेगु सहमति जूगु खः ।
माओवादी नेता पोष्टबहादुर बोगटीं सत्ता साझेदार दलया पाखें एमालें लिखित प्रस्ताव तयार यायेमफुगुलिं शुक्रवाः थुकी सहमति जुइमफुगु कनादिल । स्रोतया कथं एमालें राष्ट्रपतिया पलाःया बारे संकल्प प्रस्तावय् छुं खँ न्ह्यथनेमाःगु व कांग्रेसं धाःसाः छुं नं खँ न्ह्यथनेमज्यूगु खँ धायेवं विवाद उत्पन्न जूगु खः ।
