कम्युनिष्ट पार्टीतय् नां हिलेगु अभियान

नेकपा माओवादी व नेकपा एमाले निगुलिं तःधंगु वाम पार्टीतय्सं आः थःथःपिनि नांया लिउने घानाच्वंगु माओवादी व एमाले धइगु न्हिप्यं चीकेगु खँ सार्वजनिक याःगु दु । देशय् ब्वलंगु न्हूगु परिस्थिति अन्तर्राष्ट्रिय दातृ निकायतय् दवाव व पार्टी दुने वयाच्वंगु न्हूगु लहरं निगुलिं पार्टीयात प्रभावित यानाच्वंगुया थ्व लिच्वः खः । थ्वहे सन्दर्भय् निगुलिं पार्टीं थःपिंत नेपाल कम्युनिष्ट पार्टी जक धइगु नामं संवोधन यानाः लिउनेया विभाजनवोधक न्हिप्यं चीकेगु खँ धाःगु खः ।

खतुं नेपाःया सुं नं कम्युनिष्ट पार्टीया लिउने अन्य खँग्वः वया मबिउसा बांलाःगु हे खः । शुरुइ ला नेपाली कम्युनिष्ट पार्टीया नां ुनेकपाु हे जक खः । लिपा पार्टी कुचा जुजुं लिउने अनेक नांया न्हिप्यं नं घाघां वन । आः हानं छक्वः फुक्क कम्युनिष्ट पार्टीत छप्पँ जुयाः पार्टीया नां ुनेकपाु हे जक यायेमाली धइगु खँ वयाच्वंगु दु । तर पार्टी एकीकरण यानाः लिउनेया न्हिप्यं लिकायेगु सोच थुमिसं यानाच्वंगु खःसा व सकारात्मक हे खँ जुल । अथे मखुसें पिनेया दवावं जक नां हिलेगु कुतः यानाच्वंगु खःसा व धाःसा दकलय् बांमलाःगु ज्या जुया बी । कम्युनिष्ट पार्टीतय्त न्हिप्यं जक मखु पूरा नां हे हीकेगु लागिं दातृ निकायतय्सं दवाव बियाच्वंगु दु । अज्याःगु दवावया सामना यायेगु पलेसा कम्युनिष्ट पार्टीत थःगु नां हिलेगु अभियानपाखे न्ह्यानाच्वंगु खःसा उमिसं थःत राष्ट्रवादी आन्दोलनया न्ह्यलुवाः धकाः यानाच्वंगु दावी नं त्वःतूसां जी ।

More Stories Like this