असहमति दथुइ सहमति मालेत प्रधानमन्त्रीया इनाप
प्रधानमन्त्री माधवकुमार नेपालं असहमतिया दथुइ सहमति मालाः न्ह्यावनेमाःगु खँय् बः बियादीगु दु । वयेकलं स्वदँया दुने दलत सहमतिया हे राजनीति यानाः न्ह्याः वंगुलिं देशय् तःधंगु उपलब्धि हासिल याःगु धयादिल ।
अहिंसा दिवस व महात्मा गान्धीया बुन्हिया लसताय् शुक्रवाः येँय् ग्वसाःग्वःगु छगू ज्याझ्वलय् न्ववानादिसें प्रधानमन्त्री नेपालं असहमतिया दथुइ सहमति मालेगुया विकल्प दलत नाप मदुगु धयादिल । वयेकलं संविधान निर्माण व शान्ति प्रकृयायात तार्किक निष्कर्षय् थ्यंकेत दलत मिलेजुया वनेमाःगु खँ धयादिल ।
वयेकल धयादिल, - 'असहमतिया दथुइ नं सहमति मालाः संविधान निर्माण व शान्ति प्रकृयायात तार्किक निष्कर्षय् थ्यंकेमाः ।'
अथेहे ज्याझ्वलय् नेपाली कांग्रेसया वरिष्ठ नेता शेरबहादुर देउवां त्रास व धम्की बिनाया आन्दोलनय् तःधंगु शक्ति दुगु धयादिसें माओवादीयात नं अज्याःगु खँ थुइकेत इनाप यानादिल । वयेकलं माओवादीं राष्ट्रपतिया विवादित दयेकूगु धयादिसें कांग्रेसं राष्ट्रपतिया गरिमाय् आँच वयेमबीगु धयादिल । अथेहे वयेकलं वर्तमान सरकार छुं नं हालतं क्वमदलीगु दाबी नं यानादिल ।
