नेवाःत सचेत जुइमाःगु ई त्यल
ख्वप (सन्ध्या टाइम्स)/ पीच्यागूगु विराट नेपालभाषा साहित्य सम्मेलन ख्वपया वडा नं.-५ याछेँय् छगू समारोहया दथुइ म्हिगः शिक्षाविद् व साहित्यकार लक्ष्मण राजवंशीं उलेज्या यानादिल। ज्याझ्वलय् वय्कलं देय्या ध्यान न्हूगु संविधान दयेकेगुपाखे वनाच्वंगु इलय् नेवाःतय्सं नं थःगु हक अधिकार सुरक्षित यायेया लागिं दकलय् संवेदनशील जुयाः न्ह्यचिलेमाःगु ई वयाच्वंगु खँ कनादिल। ज्याझ्वलय् वय्कलं थुगुसीया एसएलसी परीक्षाय् नेपालभाषा विषयय् दकलय् अप्वः ल्याः हयाः पास यानादीम्ह परोपकार उच्च माविया रीना बज्राचार्ययात नेपालभाषा पदक लःल्हानादिल। अथे हे इमेज च्यानल व भक्तपुर एफएमयात सञ्चार ख्यःपाखें नेपालभाषा उत्थान यायेगु ज्याय् याःगु योगदानयात कदर यासें हनापौ नं लःल्हानादिल ।
सभापतिया थासं विराट गुथिया सल्लाहकार व नेपाल साहित्य मन्दिर ख्वपया नायः तिलकप्रकाश कायस्थं अन्तरिम संविधान कथं प्राप्त गणतन्त्रयात संस्थागत यानाः न्हूगु संविधान निर्माण यायेगु ज्याय् राष्ट्रया ध्यान वनेमाःगु खँ कनादिल। ज्याझ्वलय् साहित्यकारपिं प्रा. नर्मदेश्वर प्रधान, हृदयप्रसाद मिश्र, कृष्णमोहन जोशी, प्रदीपरत्न शाक्य, रोशनकुमार श्रेष्ठ, मदन तण्डुकार, केशरत्न शाक्य, भगतदास श्रेष्ठ, मीना बज्राचार्य, जितेन्द्र महर्जन, रश्मि नापित, अर्जुन नेपाःमि, पुष्परत्न ताम्रकारपिंसं थःपिनि रचना पाठ यानादीगु खः ।
ग्वाहालि पुचःया नायः बालगोपाल फैजूं लसकुस यानाः न्ह्याकूगु प्यघौ ताःहाकःगु उगु ज्याझ्वः भक्तपुर एफएमपाखें प्रत्यक्ष प्रशारण याःगु खः ।
सम्मेलनया थौं जुइगु ज्याझ्वलय् 'नेवाः स्वायत्त राज्य स्थापनाया लागिं नेवाःतय् भूमिका' विषयय् न्वचु बीगु ग्वसाः दु। उकी हितमान शाक्य, नरेश ताम्रकार, नरेन्द्रभक्त हाडा, तीर्थराम डंगोल, डा. चुन्दा बज्राचार्य, सानुराजा शाक्यपिंसं न्ववानादी ।
थौं हे त्वाः थकालि दिलबहादुर सिजख्वाः, नौबाजा गुरु हरिगोविन्द रंजित, कृष्ण बासुकला व गणेशबहादुर सिजख्वःपिंत हनेज्या नापं थीथी सांस्कृतिक ब्वज्या नं याइगु ग्वसाः दु। थगुनेया सांस्कृतिक ब्वज्याय् उत्कृष्ट जूगु लनर्स एकेडमि व नेपाः हिउपाः खलःयात नं थौं हनेत्यंगु दु ।
